2026 ވަނަ އަހަރުގެ ފީފާ ވޯލްޑް ކަޕްގައި އޮސްޓްރޭލިއާ ބަލިކޮށް، މިސްރުން އެ ގައުމުގެ ތާރީޚުގައި ފުރަތަމަ ފަހަރަށް މުބާރާތުގެ ގަދަ 16 އިން ޖާގަ ހޯދައިފިއެވެ. މިއާމީގައި ކުޅުނު މި މެޗުގެ ފުރިހަމަ ވަގުތާއި އިތުރު ވަގުތު ހަމަވިއިރު 1-1 އިން ދެ ޓީމު އެއްވަރުވެފައި އޮތުމުން، ނަތީޖާ ނެރުނީ ޕެނަލްޓީ ޖަހައިގެންނެވެ.
ޕެނަލްޓީ ޝޫޓްއައުޓްގައި މިސްރުން ކުރިހޯދީ 4-2 ގެ ނަތީޖާއަކުންނެވެ. މިސްރު މޮޅުވި ޕެނަލްޓީ ކާމިޔާބުކޮށްދިނީ އެ ޓީމުގެ ޑިފެންޑަރު ހުސާމް އަބްދުލްމަޖީދު އެވެ. މިއީ އެފްރިކާގެ މި ގައުމުން ވޯލްޑް ކަޕްގެ ތާރީޚުގައި ހޯދި އެންމެ ބޮޑު އެއް ކާމިޔާބީއެވެ.
މީގެ އިތުރުން، ދުނިޔޭގެ ޗެމްޕިއަން އާޖެންޓީނާ ވެސް ވަނީ ކޭޕް ވާޑްއާ ދެކޮޅަށް ކުޅުނު އުނދަގޫ މެޗު ކާމިޔާބުކޮށް ގަދަ 16 އިން ޖާގަ ކަށަވަރުކޮށްފައެވެ. މިއާމީގައި ކުޅުނު މި މެޗުން މޮޅުވުމާއެކު، ނޮކައުޓް ބުރުގައި އާޖެންޓީނާ ބައްދަލުކުރަން ޖެހޭނީ ތާރީޚީ ކާމިޔާބީއެއް ހޯދި މިސްރާއެވެ.
ކެންސަސް ސިޓީގައި ކުޅުނު އަނެއް މެޗުގައި ކޮލަމްބިއާ ވަނީ ގާނާ ބަލިކޮށް މުބާރާތުގެ ގަދަ 16 އަށް ދަތުރުކޮށްފައެވެ. މި މޮޅާއެކު ގަދަ 16 ގައި ކޮލަމްބިއާ ނުކުންނާނީ ސްވިޒަލޭންޑާ ދެކޮޅަށެވެ.
މުބާރާތުގެ ގަދަ 16 ގެ މެޗުތައް މިއަދު ފެށޭއިރު، ފުރަތަމަ މެޗުގައި ފިލަޑެލްފިއާގައި ފްރާންސް ނުކުންނާނީ ޕެރަގުއޭއާ ދެކޮޅަށެވެ. އަދި ހިއުސްޓަންގައި ކެނެޑާ އާއި މޮރޮކޯ ބައްދަލުކުރާނެއެވެ. ނޮކައުޓް ބުރުގެ އެހެން މެޗުތަކަށް ބަލާއިރު، ބްރެޒިލް ނޯވޭއާ ދެކޮޅަށް ނުކުންނައިރު، މެކްސިކޯ ބައްދަލުކުރާނީ އިންގްލެންޑާއެވެ.