މިއަހަރުގެ ޤައުމީ ދުވަހުގެ ރަސްމީ ޖަލްސާ ހާއްސަ ރަސްމިއްޔާތަކާއެކު ހއ. އުތީމުގައި ބޭއްވުމަށް ނިންމައިފިއެވެ. ރައީސް އޮފީހުން މަޢުލޫމާތު ދެއްވާގޮތުގައި މިއަހަރުގެ ޤައުމީ ދުވަހުގެ ރަސްމީ ޖަލްސާ އޮންނާނީ އަންނަ ހޮނިހިރު ދުވަހުގެ ހެނދުނު 10:00 ގައެވެ.
ޤައުމީ ދުވަހަކީ އޮގަސްޓު 14 ވަނަ ދުވަހު ފާހަގަކުރާ ދުވަހެކެވެ. މި ދުވަސް ނިސްބަތްވަނީ ޕޯޗުގީޒުންގެ އަޅުވެތިކަމުން ދިވެހިރާއްޖެ ސަލާމަތްކުރެއްވި އައްސުލްޠާން މުޙައްމަދު ތަކުރުފާނު އަލްއަޢުޡަމް ހޯއްދެވި ތާރީޚީ ނަޞްރަށެވެ. އިސްލާމީ ކަލަންޑަރުގައި ޤައުމީ ދުވަސް ފާހަގަކުރަނީ ކޮންމެ އަހަރެއްގެވެސް ރަބީޢުލްއައްވަލް މަހުގެ 1 ވަނަ ދުވަހުއެވެ.
ރައީސް އޮފީހުން ބުނެފައިވާ ގޮތުގައި މި އަހަރުގެ ޖަލްސާގައި ޤައުމީ އިނާމު ދިނުން އޮންނާނެއެވެ. އެގޮތުން ޝަރަފުވެރިކަމުގެ ޤައުމީ އިނާމު 3 ފަރުދަކަށާއި 1 ޖަމިއްޔާއަކަށް އަދި ހިތްވަރުދިނުމުގެ ޤައުމީ އިނާމު 7 ފަރުދަކަށާއި 1 ކުންފުންޏަކަށް އަރުވާނެއެވެ. މީގެއިތުރުން، ދައުލަތަށް ޚިދުމަތް ކުރުމުގެ ޤައުމީ އިނާމު ނިޔާވެފައިވާ އެކަކަށް ނިސްބަތްކޮށް އަރުވާނެއެވެ.
މި އިނާމުތައް ލިބޭ ފަރާތްތައް ކަނޑައަޅުއްވާފައިވަނީ ޤައުމީ އިނާމާބެހޭ ކޮމިޓީންނެވެ. ޝަރަފުވެރިކަމުގެ އިނާމު ލިބޭ ފަރާތްތަކަށް ޝަރަފުގެ ބެޖާއި، އައްޑަނަ އަދި ހަނދާނީ ލިޔުން އަރުވާނެއެވެ. އަދި ހިތްވަރުދިނުމުގެ އިނާމު ލިބޭ ފަރާތްތަކަށް އަރުވާނީ ހަނދާނީ ފިލާ އާއި ހަނދާނީ ލިޔުމެވެ.
އައްސުލްޠާން މުޙައްމަދު ތަކުރުފާނުގެ އުފަން ރަށް ކަމަށްވާ ހއ. އުތީމުގައި މިދިޔަ އަހަރުވެސް ޤައުމީ ދުވަހުގެ ރަސްމީ ޖަލްސާ ވަނީ ބާއްވާފައެވެ. މީގެކުރިން މާލޭގައި ބާއްވަމުން އައި މި ޖަލްސާ، 2025 އާއި 2026 ވަނަ އަހަރުވެސް އުތީމުގައި ބޭއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރިން ވަނީ ނިންމަވާފައެވެ.