އެމެރިކާއާއެކު ކުރެވެމުންދާ ހަނގުރާމަ ނިމުމަކަށް ގެނައުމުގެ މަގުސަދުގައި އީރާނުން ހަތް ދުވަހުގެ ރޯޑްމެޕެއް ހުށަހަޅައިފިއެވެ. އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވީ، މި ޕްލޭން ތަންފީޒުކުރުމުގެ ކުރިން ތެހެރާނުން އިންތިޒާރު ކުރަމުންދަނީ ވޮޝިންޓަންގެ ޖަވާބަކަށެވެ.
މި ހުށަހެޅުން އެމެރިކާއަށް ރައްދުކޮށްފައިވަނީ ނިއުޔޯކުގައި ކުރިއަށްދިޔަ އދ. ގެ އާންމު މަޖިލީހުގެ ހަވާސާގައި، ގަތަރު ހިމެނޭހެން މެދުވެރިން މެދުވެރިކޮށް ކުރިއަށްދިޔަ ޑިޕްލޮމެޓިކް މުއާމަލާތްތަކުގެ ތެރެއިންނެވެ.
މި ޕްލޭންގެ ދަށުން، މުޅި ސަރަހައްދުގައި ހިނގަމުންދާ ހަމަނުޖެހުންތައް ނިމުމަކަށް އަންނާނެ ކަމަށް އީރާނުން ބުނެއެވެ. އޭގެ ބަދަލުގައި، އީރާނުގެ ބަނދަރުތަކަށް އެމެރިކާއިން އަޅާފައިވާ ކަނޑުގެ ބްލޮކޭޑް އުވާލުމަށާއި، އީރާނުގެ ތެޔޮ އެކްސްޕޯޓް ކުރުމަށް އަޅާފައިވާ ދަތިކުރުމުގެ ފިޔަވަޅުތަކަށް ލުއި ދިނުމަށް ވަނީ ހުށަހަޅާފައެވެ. މީގެއިތުރުން ފްރީޒްކޮށްފައިވާ އީރާނުގެ މާލީ ހަރުމުދާތައް ދޫކޮށްލުމަށް ވެސް މި ހުށަހެޅުމުގައި ވެއެވެ.
އަރަގްޗީ ވިދާޅުވި ގޮތުގައި، ޝަރުތުތައް ފުރިހަމަވެއްޖެނަމަ ހަތްވަނަ ދުވަހު ހޮރުމުޒް ކަނޑުއޮޅި އަލުން ހުޅުވާލެވޭނެއެވެ. އަދި ހުށަހެޅިފައިވާ ރޯޑްމެޕްގެ ދަށުން އީރާނުގެ ނިއުކްލިއާ ޕްރޮގްރާމާ ގުޅޭ މަޝްވަރާތައް ވެސް އަލުން ފެށިގެންދާނެއެވެ.
މި ހުށަހެޅުމަކީ ޖޫން މަހު އެމެރިކާއާއި އީރާނާ ދެމެދު ވެވުނު އެއްބަސްވުމުގައި ހިމެނޭ ކަންކަމާ އެއްގޮތަށް އެކުލަވާލާފައިވާ ހުށަހެޅުމެކެވެ. އެ އެއްބަސްވުން ކުރިން ރޫޅިގެން ދިޔައީ ދެފަރާތުން ވެސް އެއްބަސްވުމާ ހިލާފުވެފައިވާ ކަމަށް ބުނެ ކުރި ތުހުމަތުތަކާ ގުޅިގެންނެވެ.
އަރަގްޗީ ވިދާޅުވީ އެމެރިކާއިން މި ޝަރުތުތަކަށް އެއްބަސްވިހާ އަވަހަކަށް ރޯޑްމެޕް ތަންފީޒުކުރަން ފެށުމަށް ތެހެރާން އޮތީ ތައްޔާރަށް ކަމަށާއި، ދެން އޮތީ އެމެރިކާއިން ނިންމަންޖެހޭ ނިންމުމެއް ކަމަށެވެ.