ދިވެހިރާއްޖޭގައި މިވަގުތު ހިމަބިހި ޖެހިފައިވާ އެއްވެސް މީހަކު ނެތް ކަމަށާއި، ރާއްޖެއަކީ އަދިވެސް މި ބަލި ކޮންޓްރޯލް ކުރެވިފައިވާ ގައުމެއްގެ ގޮތުގައި ދެމިއޮތް ކަމަށް ހެލްތު މިނިސްޓަރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.
ދިވެހިރާއްޖޭގެ އަޑުގެ ޕްރޮގްރާމެއްގައި ވާހަކަދައްކަވަމުން މިނިސްޓަރު ވިދާޅުވީ، މެއި މަހު ބަލި ފެތުރެން ފެށި ނަމަވެސް، މިހާރު ހިމަބިހި ޖެހޭ މީހުންގެ އަދަދު ވަރަށް ބޮޑަށް ދަށްވެފައިވާ ކަމަށެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތަފާސްހިސާބުތަކުން ދައްކާ ގޮތުގައި، ސެޕްޓެމްބަރު މަހުގެ ދެވަނަ ހަފްތާގައި ރިޕޯޓްކޮށްފައިވަނީ އެންމެ ފަސް ކޭހެވެ.
މިނިސްޓަރު ވިދާޅުވީ މިހާތަނަށް 16،000 އަށް ވުރެ ގިނަ މީހުން ހިމަބިހީގެ ވެކްސިން ޖަހާފައިވާ ކަމަށާއި، މިއީ ބަލި ޖެހޭ މީހުންގެ އަދަދު ދަށްވުމަށް މެދުވެރިވި މުހިންމު ސަބަބެއް ކަމަށެވެ. އަދި ރާއްޖެއިން ފެނުނު ކޭސްތަކަކީ ރާއްޖެއިން ބޭރުން އައި މީހުންނާއި، ރާއްޖެއަށް އެތެރެވި ބިދޭސީންގެ ފަރާތުން ފެނުނު ކޭސްތަކެއް ކަމަށް ވެސް ފާހަގަކުރެއްވިއެވެ.
މިނިސްޓަރު ވަނީ އިތުރު ކޭސްތަކެއް ނުފެނި މި ހާލަތު ދެމިއޮންނާނެ ކަމަށް އުއްމީދުކުރައްވާ ކަމަށާއި، އޭގެ ސަބަބުން ބަލި ކޮންޓްރޯލް ކުރެވިފައިވާ ގައުމެއްގެ ގޮތުގައި ރާއްޖެއަށް ދެމިއޮވެވޭނެ ކަމަށް ވިދާޅުވެފައެވެ.
ހިމަބިހީގެ ވެކްސިންގެ ދެ ޑޯޒް ފުރިހަމަކުރެވުނުކަން ޔަގީންނުވާ ފަރާތްތަކުން، ކަނޑައެޅިފައިވާ ވެކްސިން ސެންޓަރުތަކަށް ގޮސް ވެކްސިން ފުރިހަމަކުރުމަށް ސިއްހީ އިދާރާތަކުން ވަނީ އިލްތިމާސްކޮށްފައެވެ.