ހަށިގަނޑުގެ އެތެރޭގައި ފޮރުވައިގެން ރާއްޖެއަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ދެ ބިދޭސީން ފުލުހުން ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ނޭޕާލަށް ނިސްބަތްވާ އުމުރުން 47 އަހަރުގެ ނިއްކާ ތަމަންގް އަދި އީރާނަށް ނިސްބަތްވާ އުމުރުން 40 އަހަރުގެ ގައްލޭއެވެ.
ފުލުހުން ވިދާޅުވި ގޮތުގައި މި ދެމީހުންނަކީ ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން ރާއްޖެ އެތެރެވާން އުޅޭ ކަމަށް ކަސްޓަމްސްއަށް ޝައްކުކުރެވިގެން ހިފެހެއްޓުމަށްފަހު ފުލުހުންނާ ހަވާލުކުރި ދެމީހުންނެވެ. މި ދެމީހުން ޑްރަގް އެންފޯސްމަންޓް ޑިޕާޓްމަންޓުން ހައްޔަރުކޮށްފައިވަނީ ސެޕްޓެމްބަރު މަހުގެ 25 ވަނަ ދުވަހުއެވެ.
މި ދެމީހުން ބަލައި ފާސްކުރުމުގެ ތެރޭގައި މަސްތުވާތަކެތި އަޅާފައިވާ 142 ކެޕްސޫލް ފެނިފައިވާ ކަމަށާއި، މި ތަކެތީގެ ޖުމްލަ ބަރުދަނުގައި 1.5 ކިލޯގްރާމަށްވުރެ ގިނަ ހުރި ކަމަށް ފުލުހުން މައުލޫމާތު ދެއެވެ.
މި މައްސަލައިގައި ހައްޔަރުކުރި ދެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ ދެމީހުންގެ ބަންދަށް ކޯޓުން ވަނީ 30 ދުވަހުގެ މުއްދަތެއް ދީފައެވެ.