ރ. މަޑުއްވަރީގައި ބިދޭސީ އަންހެނެއްގެ އަތުން ފޭރެން އުޅުނު ކަމުގެ ތުހުމަތުގައި ހައްޔަރުކުރި އުމުރުން 24 އަހަރުގެ ނޭޕާލް ފިރިހެނެއްގެ ބަންދަށް ކޯޓުން ފަސް ދުވަސް ޖަހައިދީފިއެވެ.
އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ. އޭނާގެ މައްޗަށް ތުހުމަތު ކުރެވެނީ އެ އަންހެން މީހާ ބިންމައްޗަށް ވައްޓާލުމަށްފަހު އޭނާގެ އަތުން ފޭރެން މަސައްކަތް ކުރި ކަމަށެވެ. މި ހާދިސާ ހިނގި މަންޒަރު ފެންނަ ވީޑިއޯއެއް ވަނީ މީސްމީޑިއާގައި ދައުރުވެފައެވެ.
ފުލުހުން ވިދާޅުވީ މި ހާދިސާ ހިނގި ވަގުތު އެ ސަރަހައްދުގައި ހުރި ދިވެއްސަކު ވަދެ، އެ އަންހެން މީހާ ސަލާމަތްވުމަށް އެހީތެރިވެދީފައިވާ ކަމަށެވެ.
މި މައްސަލައާ ގުޅިގެން މިދިޔަ ހޮނިހިރު ދުވަހު ހައްޔަރުކުރި ތުހުމަތުކުރެވޭ މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މައްސަލަ ތަހުގީގު ކުރުމަށްޓަކައި އޭނާ ބަންދުގައި ބަހައްޓަން ފަސް ދުވަހުގެ މުއްދަތެއް ކޯޓުން ވަނީ ދީފައެވެ.