މެލޭޝިއާގެ ކުރީގެ ބޮޑުވަޒީރު މަހާތީރު މުޙައްމަދުގެ އަނބިކަނބަލުން ޑރ. ސިތީ ހަސްމާ މުޙައްމަދު ޢަލީ، އުމުރުފުޅުން 100 އަހަރުގައި މިއަދު ކުއާލަލަމްޕޫރުގެ ނޭޝަނަލް ހާޓް އިންސްޓިޓިއުޓްގައި އަވަހާރަވެއްޖެއެވެ. މިކަން އެކަމަނާގެ ދަރިކަލަކު ވަނީ ކަށަވަރުކޮށްދެއްވާފައެވެ.
ޑރ. ސިތީ ހަސްމާއަކީ ސިންގަޕޫރުގެ ކިންގް އެޑްވާޑް VII ކޮލެޖް އޮފް މެޑިސިންއިން 1955 ވަނަ އަހަރު ދަސްވެނިވެވަޑައިގަތުމަށްފަހު، މަލާޔާގައި މެޑިކަލް އޮފިސަރެއްގެ ގޮތުގައި ޚިދުމަތް ކުރެއްވި ފުރަތަމަ މެލޭ އަންހެނުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އެކަމަނާ ވަނީ އާންމު ސިއްހަތުގެ ދާއިރާއިން، ވަކިން ޚާއްސަކޮށް މައިންނާއި ކުޑަކުދިންގެ ސިއްހަތާއި، އާއިލާ ރޭވުމާއި، އަދި ރަށްފުށުގެ ސިއްހީ ޚިދުމަތްތައް ކުރިއެރުވުމަށް ގިނަގުނަ މަސައްކަތްތަކެއް ކުރައްވާފައެވެ.
އެކަމަނާއަށް ޑރ. މަހާތީރު ފުރަތަމަ ދިމާވެވަޑައިގަތީ މެޑިކަލް ދަރިވަރުންގެ ގޮތުގައި ކިޔަވާ ވިދާޅުވަމުން ގެންދެވި ދުވަސްވަރުއެވެ. އެ ދެބޭފުޅުން ކައިވެނި ބައްލަވައިގަތީ 1956 ވަނަ އަހަރުއެވެ. މި ދެމަފިރިކަނބަލުންނަށް ހަތް ބޭފުޅުން ލިބިވަޑައިގެންފައިވާއިރު، މިއަހަރުގެ އޯގަސްޓް މަހު ވަނީ ކައިވެނީގެ 70 ވަނަ އަހަރީ ދުވަސް ފާހަގަކުރައްވާފައެވެ.
މެލޭޝިއާގައި އެންމެ ދިގު މުއްދަތަކަށް ބޮޑުވަޒީރުކަން ކުރެއްވި މަހާތީރުގެ އަނބިކަނބަލުންގެ ދައުރުގެ އިތުރުންވެސް، ސިތީ ހަސްމާ ވަނީ ސިއްހީ އަދި އިޖުތިމާއީ ގިނަ ހަރަކާތްތަކެއްގައި އަމަލީ ގޮތުން ބައިވެރިވެވަޑައިގެންފައެވެ. އަދި އާންމު ސިއްހަތާއި، ތައުލީމާއި ލިޔަންކިޔަން ދަސްކޮށްދިނުމާއި، އިޖުތިމާއީ ރައްކާތެރިކަމަށް ވަކާލާތު ކުރެއްވި ފާހަގަކޮށްލެވޭ ޝަޚްސިއްޔަތަކަށް އެކަމަނާ ވެގެންދިޔައެވެ. މިހާރު އުމުރުފުޅުން 101 އަހަރުގެ މަހާތީރު ވަނީ 1981 އިން 2003 އަށް އަދި 2018 އިން 2020 އަށް މެލޭޝިއާގެ ބޮޑުވަޒީރުކަން ކުރައްވާފައެވެ.
މެލޭޝިއާގެ ބޮޑުވަޒީރު އަންވަރު އިބްރާހީމް ވަނީ މަހާތީރުގެ އާއިލާއަށް ތައުޒިޔާ ވިދާޅުވެ، ސިތީ ހަސްމާގެ ޖަނާޒާގެ ކަންކަން ދައުލަތުގެ ފެންވަރުގައި ކުރިއަށްގެންދަވާނެ ކަމަށް ވިދާޅުވެފައެވެ. އެކަމަނާ ފަސްދާނުލުމަށް ހަމަޖެހިފައިވަނީ ޕުތުރާޖާޔާގެ ގައުމީ ގަބުރުސްތާނު “ޕުސާރާ ނެގަރަވަން” ގައެވެ.
ސިތީ ހަސްމާ އަވަހާރަވެފައި މިވަނީ ޖުލައި 12 ގައި ފާހަގަކުރި އެކަމަނާގެ 100 ވަނަ އުފަންދުވަހަށް ދެ މަހަށްވުރެ ކުޑަ ދުވަސްކޮޅެއް ވެފައިވަނިކޮށެވެ. މީގެއިތުރުން ވޭތުވެދިޔަ މަހު އާސިއާން ރެކޯޑްސްއިން ވަނީ ކުރީގެ ބޮޑުވަޒީރެއްގެ ދުނިޔޭގައި ހުންނެވި އެންމެ ދުވަސްވީ އަނބިކަނބަލުންގެ ގޮތުގައި އެކަމަނާ ބަލައިގަނެފައެވެ.