އޮޕަރޭޝަން ކުރަމުންދާއިރު ސިކުނޑީގެ އަމާޒުކުރެވޭ ސަރަހައްދުތައް ދެނެގަތުމަށް އެހީތެރިވެދޭ ނެވިގޭޝަން ސިސްޓަމެއް ބޭނުންކޮށްގެން ރާއްޖޭގައި ފުރަތަމަ ފަހަރަށް ކުރި ސިކުނޑީގެ އޮޕަރޭޝަން ދަރުމަވަންތަ ހޮސްޕިޓަލުން ކާމިޔާބުކަމާއެކު ފުރިހަމަކޮށްފިއެވެ.
މި އޮޕަރޭޝަން ކޮށްފައިވަނީ މެޑްޓްރޮނިކްސް ކުންފުނީގެ ސްޓެލްތްސްޓޭޝަން އެސް8 ސިސްޓަމް ބޭނުންކޮށްގެންނެވެ. މި ސިސްޓަމަކީ ސީޓީ އަދި އެމްއާރްއައި އިމޭޖުތައް ބޭނުންކޮށްގެން ބަލިމީހާގެ ސިކުނޑީގެ ތަފްސީލީ މެޕެއް އެކުލަވާލަދޭ ނިޒާމެކެވެ.
މީގެ އިތުރުން، އޮޕަރޭޝަން ކުރިއަށްދާއިރު ބޭނުންކުރާ އާލާތްތައް ދަތުރުކުރާ މަގު މި ސިސްޓަމުން ޓްރެކްކޮށްދެއެވެ. މީގެ ސަބަބުން ސިކުނޑީގެ މުހިންމު ބައިތަކަށް ގެއްލުން ނުވެ، ވާސިލުވާން ބޭނުންވާ ސަރަހައްދަށް ވާސިލުވުމަށް ޑޮކްޓަރުންނަށް ފަސޭހަވެގެންދެއެވެ. މި ޓެކްނޮލޮޖީއަކީ ސިކުނޑީގެ ޓިއުމަރު ނެގުމާއި ބަޔޮޕްސީ ހެދުން ފަދަ އޮޕަރޭޝަންތަކުގައި ބޭނުންކުރެވޭނެ އެހީތެރި ވަސީލަތެކެވެ. މިއީ ސާޖަނުންގެ ބަދަލުގައި މަސައްކަތްކުރާ އެއްޗެއް ނޫން ކަމަށާއި، މިއީ އެ ފަރާތްތަކަށް އެހީތެރިވެދޭ އާލާތެއް ކަމަށް ވެސް އައިޖީއެމްއެޗުން ފާހަގަކޮށްފައިވެއެވެ.
މި އައު ޓެކްނޮލޮޖީ ތައާރަފުކުރުމަކީ ރާއްޖޭގައި ނިއުރޮލޮޖިކަލް ހާއްސަ ފަރުވާތައް ފުޅާކުރުމަށް ކުރެވެމުންދާ މަސައްކަތްތަކުގެ ބައެކެވެ. އެގޮތުން، މިދިޔަ ފެބްރުއަރީ މަހު ދަރުމަވަންތަ ހޮސްޕިޓަލުގައި ވަނީ ނޭޝަނަލް ސެންޓަރ ފޯ ނިއުރޯސައިންސް އެންޑް ސްޓްރޯކް ހުޅުވާފައެވެ.
އެ ސެންޓަރުގެ މައިގަނޑު އަމާޒަކީ ސިކުނޑި، މައިބަދަ އަދި ސްޓްރޯކް ފަދަ ހާލަތްތަކަށް ދެވޭ ފަރުވާ އިތުރަށް ހަރުދަނާކުރުމެވެ. ހޮސްޕިޓަލުގެ އޮފިޝަލުން ވިދާޅުވާ ގޮތުގައި މިފަދަ އައު ޓެކްނޮލޮޖީތަކުގެ ސަބަބުން ރާއްޖޭގައި ކުރިއަރާފައިވާ ނިއުރޮލޮޖިކަލް ހިދުމަތްތައް އިތުރަށް ފުޅާވެގެންދާނެއެވެ.