ކަނޑުމަގުން ރާއްޖެ ގެނައި ޝިޕްމަންޓެއްގެ ތެރޭގައި ފޮރުވައިގެން އެތެރެކުރަން އުޅުނު 8,527,480 (އަށް މިލިއަން ފަސް ލައްކަ ހަތާވީސް ހާސް ހަތަރުސަތޭކަ އައްޑިހަ) ސިގިރޭޓް ސްޓިކް މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސްއިން ހާމަކުރި ގޮތުގައި މި ތަކެތި އަތުލައިގެންފައިވަނީ މި ސެޕްޓެމްބަރު މަހުގެ 27 ވަނަ ދުވަހު މާލޭ ވިޔަފާރި ބަނދަރުގައި ހިންގި ހާއްސަ އޮޕަރޭޝަނެއްގައެވެ.
އެ ޝިޕްމަންޓް ޑިކްލެއާކޮށްފައިވަނީ އާންމު މުދަލުގެ (ޖެނެރަލް ކާގޯ) ގޮތުގައެވެ. ނަމަވެސް ބަލައިފާސްކުރުމުގެ ތެރޭގައި ޝިޕްމަންޓްގެ ތެރޭގައި ގިނަ އަދަދެއްގެ ސިގިރޭޓް ފޮރުވާފައި ހުއްޓާ އޮފިސަރުންނަށް ވަނީ ފެނިފައެވެ. އަތުލައިގަތް ތަކެތީގެ އަދަދު 426,374 ސިގިރޭޓް ފޮއްޓަށް، ނުވަތަ 42,000 އަށްވުރެ ގިނަ ކާޓަންއަށް އަރައެވެ.
ކަސްޓަމްސްއިން ބުނީ މި ސިގިރޭޓްތައް މިހާރު އެ އިދާރާގެ ބެލުމުގެ ދަށަށް ގެންގޮސްފައިވާ ކަމަށާއި، މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
ރާއްޖެއަށް ސިގިރޭޓް އެތެރެކުރުމުގައި ބޮޑު އިމްޕޯޓް ޑިއުޓީއެއް ނަގައެވެ. އެގޮތުން މިހާރު ކަނޑައެޅިފައިވާ ޑިއުޓީގެ އޮނިގަނޑުގެ ދަށުން، އެތެރެކުރާ ކޮންމެ ސިގިރޭޓަކުން 4 ރުފިޔާގެ ޑިއުޓީއެއް ނަގައެވެ.