ކުއްލި ހާލަތްތަކުގައި ބޭނުންކުރެވޭނެ ކްރެޑިޓް ފެސިލިޓީއެއް ރާއްޖެއަށް ގާއިމުކުރުމާ ގުޅޭގޮތުން އޯޕެކް ފަންޑް ފޯ އިންޓަނޭޝަނަލް ޑިވެލޮޕްމަންޓް އާއެކު ރާއްޖެއިން މަޝްވަރާކޮށްފިއެވެ.
ގަތަރުގެ ދޯހާގައި ކުރިއަށްދިޔަ މި މަޝްވަރާތަކުގައި ބައިވެރިވެވަޑައިގެންނެވީ މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިސަސް ހަސަން ޒަރީރު އަދި އޯޕެކް ފަންޑުގެ ރައީސް ޑރ. އަބްދުލްހަމީދު އަލްޚަލީފާއެވެ. މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ މިއަހަރުގެ ޖެނުއަރީ މަހު ރާއްޖެއާއި އޯޕެކް ފަންޑާ ދެމެދު ސޮއިކުރެވުނު ކަންޓްރީ ޕާޓްނާޝިޕް ފްރޭމްވޯކްގެ ދަށުން އެއްބާރުލުން އިތުރަށް ވަރުގަދަކުރުމަށެވެ.
މި ބައްދަލުވުމުގައި ރާއްޖެއިން ވަނީ ފެނާއި ނަރުދަމާ އަދި ބަނދަރު ތަރައްގީކުރުން ފަދަ މުހިންމު ދާއިރާތަކަށް އެހީތެރިކަން ހޯދުމަށް ހުށަހަޅާފައެވެ. މީގެ އިތުރުން، ކުއްލި ހާލަތްތަކުގައި ބޭނުންކުރެވޭނެ ކްރެޑިޓް ލައިނެއް ގާއިމުކުރުމުގެ މުހިންމުކަންވެސް ސަރުކާރުން ވަނީ ފާހަގަކޮށްފައެވެ.
ދިވެހި ސަރުކާރުން ހާމަކުރި ގޮތުގައި 1977 ވަނަ އަހަރުން ފެށިގެން މިއަދާ ހަމައަށް އޯޕެކް ފަންޑުން ވަނީ ރާއްޖޭގެ ތަރައްގީގެ މަޝްރޫއުތަކަށް 440 މިލިއަން އެމެރިކާ ޑޮލަރަށްވުރެ ގިނަ އެހީ ފޯރުކޮށްދީފައެވެ.
މި ދަތުރުފުޅުގެ ތެރެއިން މިނިސްޓަރު ޒަރީރު ވަނީ ގަތަރު ނޭޝަނަލް ބޭންކުގެ އިސް ވެރިންނާ ބައްދަލުކުރައްވައި މާލީ އެއްބާރުލުމާއި އިންވެސްޓްމަންޓްތަކާ ގުޅޭގޮތުން މަޝްވަރާކުރައްވާފައެވެ. އަދި ކުވައިތުގެ ފިނޭންސް މިނިސްޓަރު ޑރ. ޔައުގޫބް އަލް-ސައްޔިދު އަލް-ރިފާއީއާއެކު ވަކިން ބޭއްވެވި ބައްދަލުވުމެއްގައި ސިއްހީ އަދި މޫސުމާ ގުޅުންހުރި މަޝްރޫއުތަކަށް ކުވައިތު ފަންޑް ފޯ އަރަބް އިކޮނޮމިކް ޑިވެލޮޕްމަންޓް މެދުވެރިކޮށް އެހީތެރިކަން ހޯދުމާ ގުޅޭގޮތުން މަޝްވަރާކުރެއްވިއެވެ.
މީގެ އިތުރުން އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކް (އޭއައިއައިބީ) ގެ އަހަރީ ބައްދަލުވުމުގައި ވާހަކަދައްކަވަމުން މިނިސްޓަރު ޒަރީރު ވަނީ އިންފްރާސްޓްރަކްޗަރ ތަރައްގީކުރުމުގައި އައު އީޖާދީ އަދި ދެމެހެއްޓެނިވި ގޮތްތައް ބޭނުންކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.