ރަސްމާލޭގައި ތަރައްޤީކުރާ ވޯޓާފްރަންޓް އަދި މެރީނާ މަޝްރޫޢުގެ 10 އަހަރުގެ ތަރައްޤީގެ މުއްދަތުގެ ތެރޭގައި ދަޢުލަތަށް 11 ބިލިއަން އެމެރިކާ ޑޮލަރަށް ވުރެ ބޮޑު އާމްދަނީއެއް ލިބޭނެ ކަމަށް ފިނޭންސް މިނިސްޓަރު ޙަސަން ޒަރީރު ވިދާޅުވެއްޖެއެވެ. މިނިސްޓަރު މިކަން ހާމަކުރެއްވީ އެކްސް މެދުވެރިކޮށް ކުރެއްވި ޕޯސްޓެއްގައެވެ.
މި މަޝްރޫޢުން އަހަރަކު އެވްރެޖުކޮށް ގާތްގަނޑަކަށް 1.1 ބިލިއަން އެމެރިކާ ޑޮލަރު ލިބޭނެ ކަމަށް ލަފާކުރެވޭއިރު، މިއީ ރާއްޖޭގެ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީ އުޅަނދުން ދަޢުލަތަށް އަހަރަކު ލިބޭ ޖުމްލަ އާމްދަނީއަށް ވުރެ ވެސް އިތުރު އަދަދެކެވެ. ރަސްމާލެ އެއްބަސްވުމުގެ ދަށުން ދަޢުލަތަށް އާމްދަނީ ލިބެނީ ޢާންމު ރޭޓުގައި ނެގޭ ޓީޖީއެސްޓީ އާއި، މާސްޓަރ ޑިވެލޮޕަރުގެ ފުރަތަމަ ވިއްކުންތަކާއި ކުއްޔަށް ދިނުމުން ލިބޭ އާމްދަނީގެ 10 އިންސައްތަ އަދި ޕްރޮޕަޓީގެ އަގުން 4 އިންސައްތަ ފުރަތަމަ ގަންނަ ފަރާތްތަކާއި އޭގެ ފަހުން ބަދަލުކުރާ ފަރާތްތަކުން ދައްކާ ފައިސާއިންނެވެ.
މި އެއްބަސްވުމުގެ ދަށުން އެއްވެސް ޓެކްސް ލުޔެއް ނުވަތަ ޑިއުޓީ އިޢާފުކުރުމެއް ދީފައެއް ނުވެއެވެ. އަދި މި މަޝްރޫޢަށް ސަރުކާރުން އެއްވެސް ލޯނެއް ނުނަގާނެ ކަމަށާއި ސޮވަރިން ގެރެންޓީއެއް ވެސް ނުދޭނެ ކަމަށް ބަޔާންކޮށްފައިވެއެވެ. މީގެއިތުރުން، ޕްރޮޕަޓީ ވިއްކައިގެން ލިބޭ ހުރިހާ ފައިސާއެއް ބަހައްޓަން ޖެހޭނީ ރާއްޖޭގެ އެސްކްރޯ އެކައުންޓެއްގައި ކަމަށާއި، މަޝްރޫޢުގެ ހުރިހާ ފައިސާއެއް ދައުރުވާންވާނީ ރާއްޖޭގެ ބޭންކުތައް މެދުވެރިކޮށެވެ.
މިނިސްޓަރު ޒަރީރު ހާމަކުރެއްވި ގޮތުގައި، ރަސްމާލެ އެއްބަސްވުމުގެ ދަށުން 500 ހެކްޓަރުގެ ބިމެއްގައި 20 ބިލިއަން ޑޮލަރުގެ ވޯޓާފްރަންޓް އަދި މެރީނާ ތަރައްޤީކުރާނީ 10 އަހަރުގެ މުއްދަތަކަށް ބަހާލައިގެންނެވެ. މި ޕްލޭންގެ ދަށުން ގެދޮރާއި، ހޮޓާތަކާއި، ރިސޯޓުތަކާއި، މެރީނާއެއްގެ އިތުރުން ފިހާރަތަކާއި، އޮފީސްތަކާއި، ތަޢުލީމީ އަދި ޞިއްޙީ ޚިދުމަތްދޭ ތަންތަން ޤާއިމުކުރެވޭނެއެވެ.
މި މަޝްރޫޢު ނިމި ފުރިހަމަވުމުން، އަހަރަކު 1 މިލިއަނަށް ވުރެ ގިނަ ފަތުރުވެރިން އެ ސަރަޙައްދަށް ޒިޔާރަތްކުރާނެ ކަމަށާއި، ރާއްޖޭގެ އިޤްތިޞާދަށް ފަތުރުވެރިކަމުން އަހަރަކު ގާތްގަނޑަކަށް 2 ބިލިއަން އެމެރިކާ ޑޮލަރުގެ އާމްދަނީއެއް ވަންނާނެ ކަމަށް ވަނީ ލަފާކޮށްފައެވެ.
ރަސްމާލޭގެ 500 ހެކްޓަރުގެ ސަރަހައްދެއްގައި ހިންގުމަށް ހަމަޖެހިފައިވާ މި ބިޔަ މަޝްރޫޢު ހަވާލުކޮށްފައިވަނީ ދުބާއީގެ މަޝްހޫރު ކުންފުންޏެއް ކަމަށްވާ “އީގަލް ހިލްސް” އާއެވެ. މި މަޝްރޫޢުގެ އިނީޝިއަލް އެގްރީމެންޓުގައި މިހާރު ސޮއިކޮށްފައިވާއިރު، އެ ކުންފުންޏަކީ ދުނިޔޭގެ 18 އަށް ވުރެ ގިނަ ޤައުމުގައި ބޮޑެތި މަޝްރޫޢުތައް ކާމިޔާބުކަމާއެކު ހިންގަމުން އަންނަ ތަޖުރިބާކާރު ކުންފުންޏެކެވެ.