ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދުގައި ޤަވާޢިދާ ޚިލާފަށް ހަރަކާތްތެރިވަމުން ދިޔަ ކަމަށް ޝައްކުކުރެވޭ ބޭރުގެ މަސްބޯޓެއް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އަތުލައިގެންފިއެވެ.
އެމްއެންޑީއެފުން މަޢުލޫމާތު ދިން ގޮތުގައި މި ބޯޓު އަތުލައިގަނެފައިވަނީ ކޯސްޓްގާޑުން ބުދަ ދުވަހުގެ ހަވީރު ހިންގި ޚާއްޞަ އޮޕަރޭޝަނެއްގައެވެ. މި އުޅަނދު ފެނިފައިވަނީ ހއ. ތުރާކުނުގެ ހުޅަނގު އުތުރުން ގާތްގަނޑަކަށް 46 ނޯޓިކަލް މޭލު ބޭރުންނެވެ. އަދި ބޯޓު ހިފެހެއްޓި ވަގުތު އޭގައި 7 މީހުން ތިއްބެވެ.
މި ބޯޓު ކޯސްޓްގާޑުގެ ބެލުމުގެ ދަށަށް ގެނެސްފައިވަނީ އިރުއޮއްސި 6:34 ހާއިރު، ކޯސްޓްގާޑް ޝިޕް ‘ޢިމާދުއްދީން’ ގެ ބެލުމުގެ ދަށުންނެވެ.
އެމްއެންޑީއެފުން ބުނީ މި މަސްބޯޓު ހދ. ކުޅުދުއްފުއްޓަށް ގެންދިއުމުގެ މަސައްކަތް މިހާރު ކުރަމުންދާ ކަމަށެވެ. ނަމަވެސް އެ ބޯޓަކީ ކޮން ޤައުމެއްގައި ރަޖިސްޓްރީކޮށްފައިވާ އުޅަނދެއް ކަމެއް އަދި އޭގައި ތިބި 7 މީހުންގެ ޤައުމެއް ކަމާބެހޭ އިދާރާތަކުން އަދި ހާމައެއް ނުކުރެއެވެ.
ރާއްޖޭގެ ކަނޑުގެ ސަރަޙައްދު ރައްކާތެރިކުރުމަށްޓަކައި އަވަށްޓެރި ޤައުމުތަކާ ގުޅިގެން ކަނޑުގެ ސަލާމަތީ އޮޕަރޭޝަންތައް މެދުކެނޑުމެއްނެތި ހިންގަމުން އަންނަ ކަމަށް ވެސް އެމްއެންޑީއެފުން ވަނީ ބުނެފައެވެ.