އޯއައިސީ ޔޫތު ކެޕިޓަލް 2026 ޕްރޮގްރާމުގެ ހަވާސާގައި، ދިވެހިރާއްޖޭގެ ޔޫތު، ސްޕޯޓްސް އެންޑް ފިޓްނަސް މިނިސްޓަރު އަބްދުﷲ ރާފިޢު، ތުރުކީވިލާތުގެ ޔޫތު އެންޑް ސްޕޯޓްސް މިނިސްޓަރު ޑރ. އުސްމާން އަޝްކިން ބަކްއާ ބައްދަލުކުރައްވައިފިއެވެ.
މި ބައްދަލުވުމުގައި ދެ ގައުމުގެ ދެމެދުގައި ޒުވާނުން ބާރުވެރިކޮށް ކުޅިވަރުގެ ދާއިރާ ތަރައްގީކުރުމަށް ގުޅުން ބަދަހިކުރެވިދާނެ ގޮތްތަކާ ގުޅޭގޮތުން ދެ ވަޒީރުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ. އަދި ދެ މިނިސްޓްރީގެ މެދުގައި ގުޅިގެން ކުރިއަށްގެންދާ ޕްރޮގްރާމުތަކަށް އެއްބާރުލުން ދިނުމުގެ ގޮތުން ފަހުމުނާމާއެއް (އެމްއޯޔޫ) އެކުލަވާލުމާ ގުޅޭގޮތުން ވެސް ވާހަކަދެކެވުނެވެ.
މި އެއްބަސްވުމުގެ ދަށުން، ތުރުކީވިލާތުގެ ފެންވަރު ރަނގަޅު ކުޅިވަރު ކޭމްޕުތަކުގައި ދިވެހި އެތުލީޓުންނަށް ތަމްރީނު ހޯދުމުގެ ފުރުސަތާއި، މަތީ ފެންވަރުގެ ތަމްރީނު ޕްރޮގްރާމުތަކުގައި ބައިވެރިވުމުގެ ފުރުސަތު ލިބިގެންދާނެއެވެ. މީގެ އިތުރުން، ބާސްކެޓްބޯޅަ އަދި ވޮލީބޯޅައިގެ ދާއިރާއިން ދިވެހި ކޯޗުން ތަމްރީނުކުރުމަށް ތުރުކީވިލާތުގެ ތަޖުރިބާ ހިއްސާކުރުމަށްވެސް ވަނީ ރޭވިފައެވެ.
އަލަށް އެކުލަވާލަން ހުށަހަޅާފައިވާ ފަހުމުނާމާގައި ސްޕޯޓްސް ސައިންސް، ޕެރަލިމްޕިކް ކުރިއެރުވުން، ޒުވާނުންގެ އީޖާދީ ކަންކަން، ކުޅިވަރު ވަސީލަތްތައް، ސްކޮލާޝިޕް އަދި އެތުލީޓުން ބަދަލުކުރުމުގެ ޕްރޮގްރާމުތައް ހިމެނޭނެއެވެ. ހަމައެއާއެކު، އާންމު ސިއްހަތާ ގުޅޭ ޕްރޮގްރާމުތަކާއި، ޑޭޓާގެ މައްޗަށް ބިނާކޮށް ކަންކަން ހިންގުމާއި، ޒުވާނުންގެ ކުރިއެރުމަށް މަސައްކަތްކުރާ އެހެނިހެން ހަރަކާތްތައް ވެސް މި އެއްބަސްވުމުގެ ދަށުން ކުރިއަށްގެންދިއުމަށް ވަނީ ހަމަޖެހިފައެވެ.
ދިވެހި ޒުވާނުންނާއި އެތުލީޓުންނަށް އިތުރު ފުރުސަތުތައް ފަހިކޮށްދީ، ކުޅިވަރުގެ ދާއިރާއިން އެ ފަރާތްތަކުގެ ކުރިއެރުމަށް އެއްބާރުލުން ދިނުމަށް ގުޅިގެން މަސައްކަތްކުރުމަށް ދެ ގައުމުން ވަނީ އެއްބަސްވެފައެވެ.