ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ފަހު ފިޔަވަހީގެ އަމަލީ މަސައްކަތް ފެށުމަށްޓަކައި، ސުނާމީ ބިނާ ސަރަހައްދުގައި ޕާކުކޮށްފައިވާ އުޅަނދުތައް ނެގުމަށް މިނިސްޓްރީ އޮފް އިންފްރާސްޓްރަކްޗަރ، ހައުސިން އެންޑް އާރބަން ޑިވެލޮޕްމަންޓުން އަންގައިފިއެވެ.
މިނިސްޓްރީ އޮފް އިންފްރާސްޓްރަކްޗަރ، ހައުސިން އެންޑް އާރބަން ޑިވެލޮޕްމަންޓުން ބުނީ، ބޮޑުތަކުރުފާނު މަގުގެ އެއްގަމު އަދި ސުނާމީ ބިނާ ސަރަހައްދުގައި ޕާކުކޮށްފައިވާ އުޅަނދުތައް އޮކްޓޫބަރު 3 ވަނަ ދުވަހުގެ ރޭގަނޑު 11:00 ގެ ކުރިން ނަގައި އެ ސަރަހައްދު ހުސްކުރަންޖެހޭނެ ކަމަށެވެ. އަދި ދީފައިވާ މުއްދަތު ހަމަވުމަށްފަހު އެ ސަރަހައްދުގައި ހުންނަ އުޅަނދުތައް އޮފިޝަލުން ނަގާނެ ކަމަށް ވެސް މިނިސްޓްރީން ވަނީ ހާމަކޮށްފައެވެ.
ސަރުކާރުން ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަސައްކަތް ކުރިއަށްގެންދަނީ މާލޭގެ ބޭރު މަގު ރަނގަޅު ފެންވަރަކަށް ހެދުމަށް ރާވާފައިވާ ޕްލޭނުގެ ދަށުން، އެކި ފިޔަވަހިތަކަކަށް ބަހާލައިގެންނެވެ.
މި މަޝްރޫއުގެ ދަށުން ދެން ހަދަން ބާކީ އޮތީ އުތުރު ބަނދަރު ސަރަހައްދުން ފެށިގެން ސުނާމީ ބިނާއާ ހަމައަށް އަދި އެތަނުން އެމްޕީއެލްއާ ދިމާއަށް ގުޅުވައިދޭ ބައެވެ. މިނިސްޓްރީން ބުނި ގޮތުގައި ފަހު ފިޔަވަހީގެ މަސައްކަތް ފެށުމަށް ވާންޖެހޭ ހުރިހާ ތައްޔާރީތަކެއް މިހާރު ވަނީ ނިމިފައެވެ. މީގެ ކުރީގެ ފިޔަވަހިތަކުގެ މަސައްކަތްތައް ނިންމައި މިހާރު ވަނީ އާންމުންނަށް ބޭނުންކުރެވޭ ގޮތަށް ހުޅުވާލާފައެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް، ބޮޑުތަކުރުފާނު މަގު ޒަމާނީ ފެންވަރަށް ތަރައްގީކޮށް މާލޭގެ ރިންގް ރޯޑް އިތުރަށް ފުރިހަމަކުރުމަށް ކުރިއަށްގެންދާ މުހިންމު މަޝްރޫއެކެވެ.