ދިވެހި ފުލުހުންގެ ޚިދުމަތުގެ ތަފާސްހިސާބުތައް ދައްކާ ގޮތުން ވޭތުވެދިޔަ މަހު ފުލުހުންނަށް ޖުމްލަ 924 މައްސަލައެއް ވަނީ ރިޕޯޓުކޮށްފައެވެ.
ފުލުހުންނަށް ހުށަހެޅުނު މައްސަލަތަކުގެ ތެރެއިން އެންމެ ގިނައީ ވައްކަމުގެ މައްސަލަތަކެވެ. އެގޮތުން ވައްކަމުގެ 277 މައްސަލައެއް ވޭތުވެދިޔަ މަހު ވަނީ ރެކޯޑުކުރެވިފައެވެ. ދެވަނައަށް އެންމެ ގިނައިން ރިޕޯޓުކޮށްފައިވަނީ މަގުމަތީގެ އެކްސިޑެންޓުތަކުގެ މައްސަލަތަކެވެ. އެއީ 222 މައްސަލައެވެ. އަދި މަސްތުވާތަކެއްޗާ ގުޅުންހުރި 165 މައްސަލައެއް ވެސް ވަނީ ހުށަހަޅާފައެވެ.
މީގެ އިތުރުން، އެއްޗެހި ގެއްލިގެން ހުށަހެޅި 69 މައްސަލައަކާއި، މުދަލަށް ގެއްލުން ދިނުމުގެ 57 މައްސަލައެއްގެ އިތުރުން މާރާމާރީގެ 49 މައްސަލައެއް ފުލުހުންނަށް ވަނީ ރިޕޯޓުކޮށްފައެވެ. ހަމައެއާއެކު، އަމާނާތަށް ޚިޔާނާތްތެރިވުމުގެ 30 މައްސަލައާއި، ގެވެށި އަނިޔާގެ 23 މައްސަލައާއި، ޖިންސީ ކުށުގެ 14 މައްސަލައިގެ އިތުރުން މަކަރާއި ހީލަތް ހެދުމުގެ 9 މައްސަލައަކާއި ފޭރުމުގެ 9 މައްސަލައެއް ވެސް ފުލުހުން ވަނީ ރެކޯޑުކޮށްފައެވެ.
ފުލުހުންގެ ތަފާސްހިސާބުތައް ދައްކާ ގޮތުން މި އަހަރުގެ މިހާތަނަށް ޖުމްލަ 9،454 މައްސަލައެއް ވަނީ ފުލުހުންނަށް ހުށަހަޅާފައެވެ.
މި މައްސަލަތަކުގެ ތެރެއިން ވެސް އެންމެ ގިނައިން ރިޕޯޓުކޮށްފައިވަނީ ވައްކަމުގެ މައްސަލަތަކެވެ. އެއީ ޖުމްލަ 2،610 މައްސަލައެވެ. އަދި މަގުމަތީގެ އެކްސިޑެންޓުތަކުގެ ގޮތުގައި 2،273 މައްސަލައެއް ވަނީ ރެކޯޑުކުރެވިފައެވެ.