އެޑިއުކޭޝަން މިނިސްޓްރީން 2027 ވަނަ އަހަރުގެ އެކަޑަމިކް ކަލަންޑަރު އާންމުކޮށްފައިވާއިރު، އާ ކަލަންޑަރުގައި ދަރިވަރުންނަށް ކިޔަވައިދޭ 163 ދުވަސް އަދި ބަންދުގެ ގޮތުގައި 88 ދުވަސް ވަނީ ކަނޑައަޅައިފިއެވެ.
އެޑިއުކޭޝަން މިނިސްޓްރީން އާންމުކުރި ކަލަންޑަރުގައިވާ ގޮތުން 2027 ވަނަ އަހަރުގެ ދިރާސީ އަހަރުގެ ކިޔެވުން ފެށުމަށް ހަމަޖެހިފައިވަނީ ޖެނުއަރީ މަހުގެ 17 ވަނަ ދުވަހުއެވެ.
ކަލަންޑަރުގައިވާ ގޮތުން ޓީޗަރުންގެ ތަމްރީނުތަކާއި ސަރުކާރު ބަންދު ދުވަސްތަކާ ގުޅިގެން ފެބްރުއަރީ މަހު ސްކޫލްތައް ބަންދުވާނެއެވެ. އަދި އޭގެ ފަހުން، މާޗް މަހު ފިތުރު އީދާ ދިމާކޮށް ދަރިވަރުންނަށް ތިން ހަފުތާގެ ޗުއްޓީއެއް ލިބިގެންދާނެއެވެ.
މީގެ އިތުރުން ހައްޖު ދުވަހާއި އަޟްހާ އީދުގެ ބަންދު މެއި މަހުގެ 16 އިން 20 އަށް ކުރިއަށްދާނެއެވެ.
ކަލަންޑަރުގައިވާ ގޮތުން ފުރަތަމަ ޓާމުގެ އިމްތިހާނުތައް ބޭއްވުމަށް ހަމަޖެހިފައިވަނީ ޖޫން 29 އިން ޖުލައި 8 އަށެވެ. އަދި ދެވަނަ ޓާމުގެ ކިޔެވުން އޮގަސްޓް 1 ގައި ފެށޭނެއެވެ.
ދެވަނަ ޓާމުގެ އިމްތިހާނުތައް ކުރިއަށްދާނީ ނޮވެމްބަރު 23 އިން ޑިސެމްބަރު 2 އަށެވެ. އަދި ދިރާސީ އަހަރު ރަސްމީކޮށް ނިމޭނީ ޑިސެމްބަރު 9 ގައެވެ. މި ކަލަންޑަރުގެ ދަށުން މުޅި އަހަރު ދުވަހުގެ ތެރޭގައި ދަރިވަރުން ސްކޫލަށް ހާޒިރުވާނީ 163 ދުވަހު ކަމަށްވާއިރު، ޗުއްޓީގެ ގޮތުގައި 88 ދުވަސް ލިބޭނެއެވެ.