މި އަހަރުގެ މިހާތަނަށް ޗައިނާއިން ރާއްޖެއަށް 300,977 ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
މި އަހަރު ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ 19 އިންސައްތައަކީ ޗައިނާ މާކެޓެވެ. މި އަދަދަކީ ވޭތުވެދިޔަ އަހަރުގެ މި މުއްދަތުގައި ޗައިނާއިން ރާއްޖެއަށް ޒިޔާރަތްކުރި 263,599 ފަތުރުވެރިންނާ އަޅާބަލާއިރު 14 އިންސައްތައިގެ ކުރިއެރުމެކެވެ.
ވޭތުވެދިޔަ އަހަރު ވެސް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ގައުމަކީ ޗައިނާއެވެ. އެ އަހަރު ޗައިނާއިން 329,428 ފަތުރުވެރިން ވަނީ އައިސްފައެވެ. މި އަހަރުގެ ލިސްޓުގެ ދެވަނައިގައި އޮތް ރަޝިއާއިން 229,236 ފަތުރުވެރިން ރާއްޖެއަށް އައިސްފައިވާއިރު، ތިންވަނައިގައި އޮތް ޔުނައިޓެޑް ކިންގްޑަމް (ޔޫކޭ) އިން 119,968 ފަތުރުވެރިން ވަނީ ޒިޔާރަތްކޮށްފައެވެ.
ނިމިދިޔަ ސެޕްޓެމްބަރު މަހު އެކަނިވެސް ރާއްޖެއަށް 150,764 ފަތުރުވެރިން ޒިޔާރަތްކޮށްފައިވާއިރު، މިއާއެކު މި އަހަރުގެ މިހާތަނަށް ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ އަދަދު މިހާރު ވަނީ 1.6 މިލިއަނަށްވުރެ މައްޗަށް އަރާފައެވެ.
މި އަހަރަށް ސަރުކާރުން ކަނޑައަޅާފައިވާ އަމާޒަކީ ޖުމްލަ 2.5 މިލިއަން ފަތުރުވެރިން ރާއްޖެއަށް ގެނައުމެވެ.