މިއަހަރުގެ މަސްވެރިންގެ ދުވަހާ ގުޅުވައިގެން ބާއްވާ ޚާއްޞަ އާޓް އެގްޒިބިޝަނުގައި ބައިވެރިވުމުގެ ފުރުސަތު މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މިއަދު އާންމުކޮށް ހުޅުވާލައިފިއެވެ.
“ސީސައިޑް ސްޓޯރީސް” ގެ ނަމުގައި ބާއްވާ މި މައުރަޒު ކުރިއަށް ގެންދިއުމަށް ހަމަޖެހިފައިވަނީ އަންނަ ޑިސެމްބަރު މަހުގެ 6 އިން 10 އަށެވެ. މި މައުރަޒުގެ މައިގަނޑު މަޤްޞަދަކީ ކަނޑުފަޅުގެ ދިރުންތަކާއި، ރާއްޖޭގެ މަސްވެރިކަމުގެ ޤައުމީ ތަރިކައާއި ސަޤާފަތް، އަދި ކަނޑުތަކުގެ ޤުދުރަތީ ރީތިކަން ކުރެހުމާއި ތަފާތު ފަންނުވެރިކަމުގެ ތެރެއިން ދައްކުވައިދިނުމެވެ.
މި އެގްޒިބިޝަނުގައި ބައިވެރިވާން އެދޭ ފަރާތްތަކުން މި ހިނގާ ނޮވެމްބަރު މަހުގެ 25 ވާ ބުދަ ދުވަހުގެ މެންދުރުފަހު 14:00 ގެ ކުރިން ފޯމު ހުށަހަޅަންޖެހެއެވެ. މައުރަޒަށް ހުށަހެޅޭ ފަންނީ ދާއިރާތަކުގެ ތެރޭގައި ކުރެހުމާއި ކުލަޖެއްސުން، ޑިޖިޓަލް އާޓް، ސްކަލްޕްޗަރ އަދި މިކްސްޑް މީޑިއާ ހިމެނެއެވެ.
މި މައުރަޒު ކުރިއަށް ގެންދިއުމަށް ހަމަޖެހިފައިވަނީ މައިގަނޑު ތިން ގިންތިއަކަށް ބަހާލައިގެންނެވެ:
ޖޫނިއަރ ކެޓެގަރީ: 12 އަހަރުން ދަށުގެ ކުދިންނަށް
އޯޕަން ކެޓެގަރީ: 12 އަހަރުން މަތީގެ ފަރާތްތަކަށް
އިންޓަރނޭޝަނަލް ކެޓެގަރީ: ބައިނަލްއަޤްވާމީ ފަރާތްތަކަށް
މައުރަޒަށް ހުށަހަޅާ އުފެއްދުންތަކަކީ ބައިވެރިޔާގެ އަމިއްލަ އުފެއްދުމަކަށް ވާންޖެހޭނެ ކަމަށާއި، ވަނަތައް ހޮވުމަށް ފަނޑިޔާރުންގެ ޕެނަލެއް އެކުލަވާލާނެ ކަމަށް އެ ވުޒާރާއިން މަޢުލޫމާތު ދެއެވެ. އަދި ކޮންމެ ކެޓެގަރީއަކުން އެއްވަނައަށް ހޮވޭ ފަރާތަކަށް 5،000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ.



