ރާއްޖޭގެ ސީ ޓު އެއާ ކާގޯ ޚިދުމަތް އިތުރަށް ފުޅާކޮށް ބްރިޓިޝް އެއާވޭސްގެ ފްލައިޓަކުން 8.2 ޓަނުގެ މުދާ ކެނެޑާއަށް ފޮނުވައިފިއެެވެ. މި މުދަލަކީ ސްރީލަންކާއިން ރާއްޖެއަށް ގެނެސް، ރާއްޖޭގައި ޓްރާންސިޓްކުރުމަށްފަހު ވައިގެ މަގުން ކެނެޑާއަށް ފޮނުވާފައިވާ މުދަލެކެވެ.
ބްރިޓިޝް އެއާވޭސްއަކީ މި ޚިދުމަތާ ގުޅުނު 11 ވަނަ އެއަރލައިންއެވެ. މި ޚިދުމަތް ރާއްޖޭގައި ފެށުމަށްޓަކައި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއެކު އެންމެ ފުރަތަމަ އެއްބަސްވުމުގައި ސޮއިކުރީ ޓާކިޝް އެއަރލައިންސްއިންނެވެ.
މި އަހަރުގެ މެއި މަހު ވަނީ ފުރަތަމަ ކާގޯ ޝިޕްމަންޓް ފޮނުވާފައެވެ. އަދި މި އަހަރުގެ އޮކްޓޯބަރު މަހު އެކަނިވެސް 96 ކޮންޓެއިނަރުގެ މުދާ (418 ޓަނު ނުވަތަ 34,946 ދާގީނާ) ވައިގެ މަގުން ރާއްޖެއިން ބޭރަށް ފޮނުވާފައިވެއެވެ. މިއީ މި ޚިދުމަތަށް ހުރި ޑިމާންޑު އިތުރުވަމުންދާކަމުގެ ހެއްކެކެވެ.
ޓްރާންސްޕޯޓް މިނިސްޓަރު މުޙައްމަދު އަމީން މީގެކުރިން ވިދާޅުވެފައިވަނީ މި ދާއިރާ ރެގިއުލޭޓްކޮށް ކުރިއެރުވުމަށް އިސްކަންދޭ ކަމަށެވެ. އަދި ރާއްޖެއަކީ ޔޫރަޕާއި މެދު އިރުމަތީގެ ޤައުމުތަކަށް ދަތުރުތައް ބާއްވާ ޤައުމަކަށްވުމުން،ކަށްވުމުން، މުދާ އުފުލުމުގައި އިތުރު ފުރުޞަތުތަކެއް ހުރިކަމަށްވެސް އެމަނިކުފާނު ފާހަގަކުރައްވާފައިވެއެވެ.
މި ޚިދުމަތުގެ ސަބަބުން ރާއްޖޭގެ އިޤްތިޞާދަށް ފައިދާތަކެއް ކުރާނެކަމަށް ބެލެވެއެވެ. އަދި ކުރިއަށް އޮތް ތަނުގައި މި ޚިދުމަތް އިތުރަށް ފުޅާވެ، ރާއްޖެއަކީ މުދާ ޓްރާންސިޓްކުރާ މުހިންމު މަރުކަޒަކަށް ވެގެންދާނެކަމަށް އުންމީދުކުރެވެއެވެ.