މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ރޯދަމަހާ ގުޅިގެން ޚާއްސަކޮށްފައިވާ އުސޫލުގެ ދަށުން އިއްޔެ އެކަނިވެސް 1140 ބަސްތާ ފިޔާ ކްލިއަރކޮށްދީފިއެވެ.
މި ރޯދަމަހަށް ހާއްސަކޮށް އެމްޕީއެލްގެ މަސައްކަތުގެ ސަބަބުން ބާޒާރުގައި ފިޔާގެ އަގު ވަނީ ވަރަށް ބޮޑަށް ދަށްވެފައެވެ. މިގޮތުން މިވަގުތު ފިޔާ ކިލޯއެއްގެ އަގު ހުރީ 12 ރުފިޔާގައެވެ. އަދި ފާއިތުވި ދެތިން ދުވަހުގެ ތެރޭގައި އެމްޕީއެލްއިން ވަނީ ޖުމްލަ 3000 އަށްވުރެ ގިނަ ބަސްތާ ފިޔާ ކްލިއަރކޮށްދީފައެވެ.
އެމްޕީއެލްއިން ހާމަކުރި މަޢުލޫމާތުގައިވާ ގޮތުން، އިއްޔެ ކްލިއަރކުރި ތަކެތީގެ ތެރޭގައި އަލުވީގެ 740 ބަސްތާއާއި، ކެބެޖްގެ 349 ބަސްތާއާއި، ކުކުޅު ބިހުގެ 1946 ކޭސް އަދި 264 ގަނޑު ފަތްކެޔޮ ހިމެނެއެވެ.
އަދި މީގެ އިތުރުން، 20 ފޫޓުގެ 83 ކޮންޓެއިނަރާއި 40 ފޫޓުގެ 48 ކޮންޓެއިނަރުވެސް އެމްޕީއެލްއިން ވަނީ ކްލިއަރކޮށްދީފައެވެ. ރަމަޟާން މަހާ ގުޅިގެން އަވަހަށް ހަލާކުވާ ޒާތުގެ ތަކެތި އަވަސް މުއްދަތެއްގެ ތެރޭގައި ކްލިއަރކޮށްދިނުމަށް އެމްޕީއެލްއިން ވަނީ ޚާއްސަ އިސްކަމެއް ދީފައެވެ.