ވޭތުވެދިޔަ އަހަރު ތަޢާރަފުކުރި ސީ-ޓު-އެއާ ކާގޯ ޚިދުމަތް ބޭނުންކުރާ އެއާލައިންތަކުގެ އަދަދު 17 އަށް އިތުރުވެފައިވާކަމަށް އެމްއޭސީއެލްއިން ބުނެފިއެވެ.
2022 ވަނަ އަހަރުގެ މެއި 15 ވަނަ ދުވަހު ފެށުނު މި ޚިދުމަތަކީ އެމްޕީއެލް މެދުވެރިވެގެން ކަނޑުމަގުން އަންނަ މުދާ އަވަސް އަދި ރައްކާތެރި ގޮތެއްގައި ވައިގެމަގުން އެކި ތަންތަނަށް ފޯރުކޮށްދިނުމަށް ދެ ކުންފުނި ގުޅިގެން ފަށާފައިވާ ޚިދުމަތެކެވެ.
މި ޚިދުމަތް އެންމެ ފުރަތަމަ ބޭނުންކުރަން ފެށި އެއާލައިނަކީ ޓާކިޝް އެއާލައިންސް ކަމަށްވާއިރު، މިހާރު ދުނިޔޭގެ 23 މަންޒިލަކަށް މި ޚިދުމަތް ފޯރުކޮށްދެވެއެވެ. އަދި އަހަރެއްގެ ތެރޭގައި މި ޚިދުމަތް މެދުވެރިކޮށް ދެ މިލިއަން ކިލޯގެ މުދާ އުފުލާފައިވާކަން ފާހަގަކުރެވެއެވެ.
ޓްރާންސްޕޯޓް މިނިސްޓަރު މުހައްމަދު އަމީން ފާހަގަކުރެއްވި ގޮތުގައި، މި ޚިދުމަތަށް ހުރި ޑިމާންޑު އިތުރުވަމުންދާތީ، މި ވަގުތު އެންމެ އިސްކަމެއް ދެވެނީ މި ދާއިރާ ހަރުދަނާކޮށް ކުރިއެރުވުމުގެ މަސައްކަތަށެވެ.