އެއްގަމު އުޅަނދުތަކަށް މިހާރު ދޫކޮށްފައިވާ ޑޮމެއިން ހުއްދަތައް އަލަށް ތަޢާރަފުކުރާ ސިސްޓަމަކަށް ބަދަލުކުރަން ޖެހޭނެކަމަށް ޓްރާންސްޕޯޓް މިނިސްޓްރީން މިއަދުކުރި އިއުލާނެއްގައި ބުނެފިއެވެ. މި ބަދަލު ގެންނަން ދީފައިވަނީ މި މަހުގެ 17 ވަނަ ދުވަހުން ފެށިގެން 60 ދުވަހުގެ މުއްދަތެކެވެ.
އާ ސެކިއުރިޓީ ފީޗަރތަކާއެކު ތަޢާރަފުކުރާ މި އައު ސިސްޓަމަށް ބަދަލުވުމަށްޓަކައި، ކުރިން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ ނުވަތަ ފައިސާ ދެއްކިކަމުގެ ރަސީދު ހުށަހަޅަންޖެހޭނެއެވެ. މިނިސްޓްރީން އިތުރަށް ބުނެފައިވަނީ، އައު ޑޮމެއިން ހުއްދަތައް ހޯދުމަށް ކަނޑައެޅިފައިވާ ފޯމާއެކު ލިޔެކިޔުންތައް އީމެއިލް މެދުވެރިކޮށް ނުވަތަ މިނިސްޓްރީގެ ގްރައުންޑް ފްލޯގައި ހުންނަ ޚާއްޞަ ކައުންޓަރަށް ހުށަހެޅިދާނެ ކަމަށެވެ.
މި ކައުންޓަރު ހުޅުވިފައި ހުންނާނީ ކޮންމެ ރަސްމީ ދުވަހެއްގެ ހެނދުނު 9:00 އިން މެންދުރުފަހު 1:00 އަށެވެ. އަދި ލިޔެކިޔުންތައް ހުށަހެޅުމުން، އެ ލިޔުންތައް ބަލައިގަތްކަމުގެ ރަސީދެއް ދޫކުރާނެ ކަމަށްވެސް މިނިސްޓްރީން ހާމަކޮށްފައިވެއެވެ.
މިނިސްޓްރީން އަދި އިތުރަށް އަންގާފައިވަނީ، ޑޮމެއިން އައުކުރުމަށް ދީފައިވާ މުއްދަތު ހަމަވުމަށްފަހު، ހަމައެކަނި އައު ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ އެކަނި ޞައްޙަ ލިޔުންތަކުގެ ގޮތުގައި ބަލައިގަންނާނެ ކަމަށެވެ.
މި ބަދަލާއެކު، އެއްގަމު އުޅަނދުތަކުގެ ވެރިފަރާތްތަކުން އަވަހަށް މި އައު ސިސްޓަމަށް ބަދަލުވުމަށް ސަމާލުކަން ދޭންޖެހޭނެއެވެ.