މޯލްޑިވްސް ބްރޯޑްކާސްޓިން ކޮމިޝަނުގެ (ބްރޯޑްކޮމް) ގެ މެންބަރު ކަމަށް ކުރިމަތިލާން އަލުން އިއުލާންކޮށްފި އެވެ.
ބްރޯޑްކޮމްގެ މެންބަރުކަމަށް ކުރިމަތިލުމަށް ފުރަތަމަ އިއުލާނުކުރީ މި މަހުގެ 18 ވަނަ ދުވަހެވެ. އެ އިއުލާނުގެ މުއްދަތު ހަމަވެފައިވަނީ މި މަހުގެ 26 ވަނަ ދުވަހަށެވެ.
ރައީސް އޮފީހުން މިއަދު ބުނީ ކުރިން ކުރި އިއުލާނު ބާތިލުކޮށް އަލުން ބްރޯޑްކޮމްގެ މެންބަރު ކަމަށް ކުރިމަތިލާން ހުޅުވާލާފައިވާ ކަމަށެވެ. އެހެންވެ ދެން ސުންގަޑި ހަމަވާނީ އަންނަ މަހުގެ 9 ވަނަ ދުވަހު މެންދުރު ފަހު 12:00 އަށެވެ.
ރައީސް އޮފީހުން ބުނީ ބްރޯޑްކޮމްގެ މެންބަރުކަމުގެ މަގާމަށް ކުރިމަތިލުމުގެ ފޯމު ރައީސް އޮފީހުގެ ރިސެޕްޝަނުންނާއި ވެބްސައިޓުން ލިބެން ހުންނާނެ ކަމަށާއި އެ ދެ މަގާމަށް ކުރިމަތިލާން އެދޭ ފަރާތްތަކުގެ ފޯމު ރަސްމީ ބަންދު ދުވަސްތައް ފިޔަވާ ކޮންމެ ދުވަހަކު ހެނދުނު 8:30 އިން މެންދުރު 12 ޖެހުމުގެ ނިޔަލަށް އެ އޮފީހުން ބަލައިގަންނާނެ ކަމަށެވެ.
ބްރޯޑްކޮމްގެ މެންބަރު ކަމަށް ހުޅުވައިލީ ދެ މެމްބަރެއްގެ ދައުރު ހަމަވާތީ އެވެ. އެއީ ރައީސާ މަރިޔަމް ވަހީދާ އާއި މެންބަރު އަލީ ޔޫސުފެވެ.