މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކުތަކަށް ޑޮލަރު ވިއްކާ މިންވަރު 25 އިންސައްތަ އިތުރުކުރުމަށް ނިންމައިފިއެވެ. މި ބަދަލަށް އަންނަ އާދީއްތަ ދުވަހުން ފެށިގެން އަމަލުކުރަން ފަށާނެ ކަމަށާއި، މިގޮތަށް ކުރިއަށް އޮތް ތިން މަސްދުވަހުގެ ނިޔަލަށް ޑޮލަރު ދޫކުރަމުންދާނެ ކަމަށް އެ އޮތޯރިޓީން މައުލޫމާތުދެއެވެ.
އެމްއެމްއޭ އިން މި ފިޔަވަޅު އަޅާފައިވަނީ ފަތުރުވެރިކަމުގެ ދާއިރާއިން ލިބޭ ބޭރު ފައިސާގެ އާމްދަނީ ދަށްވާ ދުވަސްވަރެއްގައި، ރާއްޖޭން ބޭރަށް ފޮނުވަންޖެހޭ ފައިސާގެ ޑިމާންޑު މަތީގައި ހުރުމުގެ ސަބަބުން ކުރިމަތިވާ ދަތިތަކަށް ހައްލެއް ހޯދައިދިނުމުގެ މަގުސަދުގައެވެ. މިއީ ބޭންކިން ނިޒާމުގެ ތެރޭގައި އޮތް ބޭރު ފައިސާގެ ދަތިކަން ކުޑަކުރުމަށާއި، އާންމުންގެ ޒަރޫރީ ބޭނުންތަކަށް ޑޮލަރު ލިބޭނެ މަގު ފަހިކޮށްދިނުމަށް އެޅުނު ވަގުތީ ފިޔަވަޅެކެވެ.
ތަފާސްހިސާބުތަކުން ދައްކާގޮތުގައި، ފާއިތުވި ފަސް މަސްދުވަހުގެ ތެރޭގައި ތައުލީމާއި ބޭސްފަރުވާއަށް ޑޮލަރު ވިއްކި މިންވަރު ވަނީ ވަރަށް ބޮޑަށް އިތުރުވެފައެވެ. އެހެންކަމުން، އެމްއެމްއޭގެ މި ނިންމުމުގެ ސަބަބުން މިފަދަ ޒަރޫރީ ބޭނުންތަކަށް ބޭންކުތަކުން ޑޮލަރު ދޫކުރުމުގައި ހުރި ދަތިތަކަށް ލުޔެއް ލިބިގެންދާނެއެވެ.
މީގެ އިތުރުން، ބޭންކް އޮފް މޯލްޑިވްސް (ބީއެމްއެލް) އިން ކާޑުތަކަށް ކަނޑައަޅާފައިވާ ޑޮލަރު ލިމިޓަށްވެސް މި މަސް ނިމުމުގެ ކުރިން ލުޔެއް ދިނުމަށް ވަނީ ހަމަޖެހިފައެވެ. މި ބަދަލުތަކާއެކު ބޭރު ފައިސާގެ ބާޒާރަށް ދިމާވެފައިވާ ފިއްތުންތަކަށް ހައްލެއް ލިބި، އިގްތިސާދީ ހަރަކާތްތަކަށް އިތުރު ކުރިއެރުމެއް ލިބޭނެ ކަމަށް ބެލެވެއެވެ.