ކުރީގެ ސަރުކާރުން ވިއްކާލި ދިރާގާއި މޯލްޑިވްސް ވޯޓާ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) ގެ ހިއްސާތައް އަނބުރާ ހޯދުމުގެ މަސައްކަތް ސަރުކާރުން ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ދިރާގަކީ ޤައުމީ މުހިންމު ރައުސްމާލެއްގެ ގޮތުގައި ފާހަގަކުރައްވައި، އެ ކުންފުނީގެ ސަރުކާރުގެ ހިއްސާ 51 އިންސައްތައަށް އިތުރުކުރުމަށް ސަރުކާރުން ނިންމާފައިވާ ކަމަށެވެ.
އިތުރު ހިއްސާތައް ހޯދުމަށްޓަކައި ކުރަންޖެހޭ މަޝްވަރާތަކާއި ތައްޔާރީތައް މިހާރު ވެސް ކުރިއަށްދާ ކަމަށާއި، އެގޮތުން އިދާރީ، ޤާނޫނީ އަދި މާލީ ގޮތުން ފުރިހަމަކުރަންޖެހޭ މަސައްކަތްތައް ކުރަމުންދާ ކަމަށް އެމަނިކުފާނު ވިދާޅުވިއެވެ.
އެމްޑަބްލިޔުއެސްސީ ސައްތައިން ސައްތަ ސަރުކާރުގެ ކުންފުންޏަކަށް ހެދުން
ރައީސް މުޢިއްޒު އިތުރަށް ވިދާޅުވީ، ބޭރުގެ ކުންފުންޏަކަށް ވިއްކާލާފައިވާ އެމްޑަބްލިޔުއެސްސީގެ 20 އިންސައްތަ ހިއްސާ އަނބުރާ ގަތުމުގެ މަސައްކަތް ވެސް ސަރުކާރުން ފަށާފައިވާ ކަމަށެވެ. މި ބަދަލުގެ އަމާޒަކީ އެ ކުންފުންޏަކީ ސައްތައިން ސައްތަ ސަރުކާރުގެ މިލްކިއްޔާތުގައިވާ ކުންފުންޏަކަށް ހަދައި، ރައްޔިތުންނަށް ދެމުންދާ ޚިދުމަތްތައް އިތުރަށް ހަރުދަނާކުރުން ކަމަށް އެމަނިކުފާނު ވިދާޅުވިއެވެ.
މި ދެ ކުންފުނީގެ ހިއްސާ ހޯދުމުގެ މަސައްކަތް ވެސް ބާރުދުވެލީގައި ކުރިއަށްދާ ކަމަށާއި، މި މަސައްކަތް ކާމިޔާބުކަމާއެކު ނިންމާލެވޭނެ ކަމުގެ ފުރިހަމަ ޔަޤީންކަން އެބައޮތް ކަމަށް ރައީސް ވިދާޅުވިއެވެ. އަދި މި ކުންފުނިތަކުގެ ކޮންޓްރޯލް އަނބުރާ ހޯދުމަކީ ޢާންމު މަޞްލަޙަތު ރައްކާތެރިކުރުމަށާއި ޤައުމީ އިޤްތިޞާދު ވަރުގަދަކުރުމަށް ނުހަނު މުހިންމު ކަމެއް ކަމުގައިވެސް އެމަނިކުފާނު ފާހަގަކުރެއްވިއެވެ.