މިއަހަރުގެ ޔޫއެފާ ޔޫރޯ 2024 މުބާރާތް ޖަރުމަނުގައި ބާއްވާއިރު ޔޫރަޕްގެ ޗެމްޕިއަންކަން ހޯދުމަށް 24 ޓީމެއް ވާދަކުރާނެއެވެ.
މީގެތެރެއިން އިޓަލީއަކީ ފައިނަލުގައި ޕެނަލްޓީ ޖަހައިގެން އިންގްލެންޑް ބަލިކޮށް މިދިޔަ ސީޒަން ކާމިޔާބުކުރި މުބާރާތުގެ ޗެމްޕިއަންކަން ހޯދި ޓީމެވެ.
ކޮވިޑް-19 އާ ގުޅިގެން 2020 ވަނަ އަހަރުގެ މުބާރާތް 2021 ވަނަ އަހަރަށް ފަސްކުރުމަށްފަހު މިއަހަރު މި ބާއްވާ މުބާރާތް ވަކިން ހާއްސަވާނެކަމަށް ބެލެވެއެވެ. އެގޮތުން ތިރީގައި މިވަނީ ޔޫރޯ 2024 އާ ބެހޭ ގޮތުން އެނގުން މުހިއްމު ބައެއް ކަންކަމެވެ.
މަހެއްހާ ދުވަހަށް ކުރިއަށްދާ މި މުބާރާތް ޖޫން މަހުގެ 14 ވަނަ ދުވަހު މިއުނިކް ފުޓްބޯލް އެރީނާގައި ފަށާއިރު، މުބާރާތް ބާއްވާ ޖަރުމަނު ނުކުންނާނީ ސްކޮޓްލޭންޑާ ދެކޮޅަށެވެ.
ގްރޫޕް ސްޓޭޖު ޖޫން މަހުގެ 26 ވަނަ ދުވަހާ ހަމައަށް ކުރިއަށްދާއިރު ނޮކްއައުޓް ސްޓޭޖު ފަށާނީ ޖޫން މަހުގެ 29 ވަނަ ދުވަހުއެވެ. މި މުބާރާތުގެ ފައިނަލް މެޗު އޮންނާނީ ޖުލައި މަހުގެ 14 ވަނަ ދުވަހު ބާލިންގެ އޮލިމްޕިއާސްޓޭޑިއަންގަ އެވެ.
މިއީ 1990 ވަނަ އަހަރު ޖަރުމަނުން އެއްބައިވަންތަވުމަށްފަހު މުބާރާތް ބާއްވާ ފުރަތަމަ ފަހަރެވެ. 1988 ވަނަ އަހަރުގެ އެޑިޝަން ސްޓޭޖްކުރީ އޭރުގެ ހުޅަނގު ޖަރުމަނުގަ އެވެ.
ޖަރުމަނު ހޯސްޓް ގައުމަކަށް ހޮވާފައިވަނީ 2018 ވަނަ އަހަރު ސްވިޒަލޭންޑްގެ ނިޔޯންގައި ބޭއްވި ޔުއެފާގެ އެގްޒެކެޓިވް ކޮމިޓީގެ ބައްދަލުވުމުގަ އެވެ. މުބާރާތް ބާއްވަން ބިޑް ކުރި ހަމައެކަނި ގައުމަކީ ތުރުކީ އެވެ.
މުބާރާތް ބާއްވަނީ ކޮންތާކު؟
މި މުބާރާތަށް 10 ތަނެއް ވަނީ ހޮވާފައެވެ. އޭގެ ތެރެއިން ނުވަ ތަނެއްވަނީ 2006 ވަނަ އަހަރުގެ ފީފާ ވޯލްޑް ކަޕް ޖަރުމަނުން ބޭއްވިއިރު ބޭނުންކޮށްފަ އެވެ.
ތިރީގައި މިވަނީ މި މުބާރާތް ބާއްވަން ހަމަޖެހިފައިވާ ހޯސްޓް ސިޓީތަކާއި ސްޓޭޑިއަމްތަކެވެ.
ބާލިން: އޮލިމްޕިއާސްޓެޑިއަން ބާލިން (71،000 ޖާގަ)
ކޮލޯން: ކޮލޯން ސްޓޭޑިއަމް (43،000 ޖާގަ)
ޑޯޓްމަންޑް: ބީވީބީ ސްޓޭޑިއަން ޑޯޓްމަންޑް (62،000 ޖާގަ)
ޑަސަލްޑޯފް: ޑަސަލްޑޯފް އެރީނާ (47،000 ޖާގަ)
ފްރެންކްފާޓް: ފްރެންކްފާޓް އެރީނާ (47،000 ޖާގަ)
ގެލްސެންކޫޝަން (5000 ޖާގަ)
ހެމްބާގް: ވޮލްކްސްޕާކްސްޓޭޑިއަން ހެމްބާގް (49،000 ޖާގަ)
ލައިޕްޒިގް: ލައިޕްޒިގް ސްޓޭޑިއަމް (40،000 ޖާގަ)
މިއުނިކް: މިއުނިކް ފުޓްބޯލް އެރީނާ (66،000 ޖާގަ)
ސްޓަޓްގާޓް: ސްޓަޓްގާޓް އެރީނާ (51،000 ޖާގަ)
ބައިވެރިވަނީ ކިތައް ޓީމު؟
ހަ ގްރޫޕަކަށް ބަހާލައިގެން ކުރިއަށްގެންދާ މި މުބާރާތުގައި 24 ޓީމެއް ބައިވެރިވާނެއެވެ. އަދި ޖުމްލަ 51 މެޗު އޮންނާނެ އެވެ.
ގްރޫޕް އޭ: ޖަރުމަނު، ސްކޮޓްލޭންޑް، ހަންގޭރީ، ސްވިޒަލޭންޑް
ގްރޫޕް ބީ: ސްޕެއިން، ކްރޮއޭޝިއާ، އިޓަލީ، އަލްބޭނިއާ
ގްރޫޕް ސީ: ސްލޮވޭނިއާ، ޑެންމާކް، ސާބިއާ، އިންގްލެންޑް
ގްރޫޕް ޑީ: ޕޮލެންޑް، ނެދަލެންޑްސް، އޮސްޓްރިއާ، ފްރާންސް
ގްރޫޕް އީ: ބެލްޖިއަމް، ސްލޮވާކިއާ، ރޫމޭނިއާ، ޔޫކްރެއިން
ގްރޫޕް އެފް: ތުރުކީ، ޖޯޖިއާ، ޕޯޗުގަލް، ޗެކް ރިޕަބްލިކް
ޔޫރަޕިއަން ޗެމްޕިއަންޝިޕްގެ ފައިނަލަށް ނުކުންނަ ހަމައެކަނި ޓީމަކީ ޖޯޖިއާ ކަމަށް ވާއިރު، ޕްލޭއޮފް ގެ ތެރެއިން ޔޫކްރެއިން އާއި ޕޮލެންޑް ވަނީ ކޮލިފައިވެފަ އެވެ.