ޔޫރޯ 2024 ގައި ރޭ ނެދަލެންޑްސްއާއި ފްރާންސް ބައްދަލުކުރި މެޗު ލަނޑެއް ނުޖެހި ނިމިއްޖެއެވެ.
ފްރާންސާއި ނެދަލޭންޑްސްއިން ވެސް މި މެޗަށް ނުކުތްއިރު، ދެ ޓީމު ވެސް ވަނީ ކުޅުނު ފުރަތަމަ މެޗުން މޮޅުވެފައެވެ. ފްރާންސް މޮޅުވީ އޮސްޓްރިއާ އަތުން 1-0 ގެ ނަތީޖާއަކުންނެވެ. އަނެއްކޮޅުން ނެދަލޭންޑްސް މޮޅުވީ ފުރަތަމަ މެޗުގައި ޕޮލެންޑް ކައިރިން 2-1 ގެ ނަތީޖާއަކުންނެވެ.
އެންމެ ފަހުން މެޗުގައި ނޭފަތުގެ ކަށިގަނޑަށް ލިބުނު އަނިޔާއާ ހެދި ބަދަލުކުރި ފްރާންސްގެ ކެޕްޓަން، ކީލިއަން އެމްބާޕޭ ރޭގެ މެޗުގައި ނުކުޅެ އެވެ. އޭގެ ބަދަލުގައި ފްރާންސްގެ ކެޕްޓަން، ބޭންޑް އެޅީ އެންޓޮއިން ގްރީޒްމަން އެވެ.
އެމްބާޕޭ ރޭގެ މެޗުގައި ކުޅެން، ފުރަތަމަ ފަރުމާކުރި ފްރާންސްގެ ދިދައިގެ ކުލަތައް ހިމެނޭ ބޭންޑް ބޭނުންކުރަން ޔުއެފާ އިން ހުއްދަނުދިނުމުން އޭނާ ބޭނުންކުރީ ކަޅު މާސްކެކެވެ.
ރޭގެ މެޗުގައި ފްރާންސުން ވަނީ ގިނަ ހަމަލާތަކެއް އުފައްދާފައެވެ. ލިބުނު ކައުންޓާ އެޓޭކެއްގައި އަރާ ނެދަލެންޑްސްއިން ގޯލެއް ޖެހިއެވެ. ނަމަވެސް، ޒަވީ ސިމޯންސް ލަނޑު ޖަހާ ޓީމްގެ އެހެން ކުޅުންތެރިންނާ އެކު އުފާފާޅުކުރި ފަހުން ލައިސްމަނާ ވާހަކަދެއްކުމަށް ފަހު ނިންމީ އޮފްސައިޑް ލަނޑެއް ކަމަށެވެ.
އޭގެ ފަހުން ފްރާންސުން ކުރިއަށް ޖެހިގެން ކުޅުނު ނަމަވެސް ލަނޑު ޖަހަން މާ ރަނގަޅު ފުރުސަތުތަކެއް ހޯދައި، ހަމަލާތަކެއް ފޮނުވައިނުލެވުނެވެ.
މިއީ މުބާރާތުގައި ލަނޑެއް ނުޖެހި އެއްވަރުވި ފުރަތަމަ މެޗެވެ.