ކާވާ ވިމެންސް ވޮލީބޯލް ޗެލެންޖް ކަޕްގެ ފައިނަލް މެޗު މިރޭ ކުޅޭއިރު، މި މެޗުގައި ދިވެހިރާއްޖެ އާއި ކިރްގިސްތާން ބައްދަލުކުރާނެއެވެ. މި މުހިންމު މެޗު ކުޅޭނީ މިރޭ 8:30 ގައެވެ.
ރޭ ކުޅުނު ސެމީ ފައިނަލް މެޗުގައި ދިވެހިރާއްޖެ ވަނީ ތަޖިކިސްތާނު އަތުން 3-1 ސެޓުން މޮޅުވެފައެވެ. މި މެޗުގައި ރާއްޖޭގެ ހުރިހާ ކުޅުންތެރިންގެ ފަރާތުން ވެސް މޮޅު ކުޅުމެއް ވަނީ ފެނިގެން ގޮސްފައެވެ.
މި މުބާރާތުގެ ތިން ވަނަ ހޮވުމަށް ކުޅޭ މެޗުގައި ތަޖިކިސްތާން އާއި އަފްޣާނިސްތާން ވާދަކުރާނެއެވެ. މި މެޗު ފަށާނީ މިއަދު ހަވީރު 4:15 ގައެވެ.
ރާއްޖޭގެ އަންހެން ވޮލީ ޓީމު ކުޅޭ ފައިނަލް މެޗަށް ވީހާވެސް ގިނަ ސަޕޯޓަރުން ދިއުމަށް ވޮލީބޯޅަ އެސޯސިއޭޝަނުން ވަނީ އެދިފައެވެ. މި މުބާރާތުގައި ރާއްޖޭގެ ޓީމު ދައްކަމުންދާ މޮޅު ކުޅުމާއެކު، ފައިނަލްގައި ވެސް ރަނގަޅު ނަތީޖާއެއް ހޯދާނެކެކަމަށް ގިނަ ބަޔަކު އުންމީދު ކުރެއެވެ.