އެމެރިކާގެ ކެލިފޯނިއާގައި ފާއިތުވި ދުވަސްތަކުގައި ބޭއްވުނު 6 ވަނަ ކެރަމް ވޯލްޑް ކަޕުން މެޑަލް ހޯދައިގެން އައި ދިވެހިރާއްޖޭގެ ކެރަމް ގައުމީ އަންހެން އަދި ފިރިހެން ޓީމުތަކަށް ރަސްމީކޮށް މަރުޙަބާ ކިޔައިފިއެވެ.
މި މުބާރާތުގައި 18 ގައުމަކުން ބައިވެރިވެފައިވާއިރު، ދިވެހިރާއްޖޭގެ އަންހެން އަދި ފިރިހެން ޓީމު ދެޓީމުންވެސް ވަނީ ލޯ މެޑަލް ހޯދާފައެވެ. އަންހެން ޓީމުން ތިންވަނަ ހޯދީ މުބާރާތް ބޭއްވި ގައުމު އެމެރިކާ އަތުން 2-1 އަށް މޮޅުވެގެންނެވެ. އަދި ފިރިހެން ޓީމުން ތިންވަނަ ހޯދީ ސިންގަޕޫރާ ދެކޮޅަށް ކުޅުނު މެޗުން 2-1 އަށް މޮޅުވެގެންނެވެ.
ވެލާނާ އިންޓަނޭޝަނަލް އެއަރޕޯޓުގައި ބޭއްވުނު މަރުޙަބާ ދެންނެވުމުގެ ރަސްމިއްޔާތުގައި ކޮމިޝަނަރ އޮފް ސްޕޯޓްސް މުޙައްމަދު ތޮލާލާއި ކުޅިވަރު ވުޒާރާގެ އިސްވެރިންގެ އިތުރުން މޯލްޑިވްސް އޮލިމްޕިކް ކޮމިޓީގެ ރައީސް މުޙައްމަދު އަބްދުއްސައްތާރު އަދި ޖެނެރަލް ސެކެޓްރީ ތަމޫހު އަހުމަދު ސައީދު ބައިވެރިވެވަޑައިގެންނެވިއެވެ.