ރާއްޖޭގެ ކުޅިވަރު ކުރިއެރުވުމަށްޓަކައި ދިގު މުއްދަތުގެ ޕްލޭނެއް އެކުލަވާލައިފިއެވެ. މި ޕްލޭނުގައި ރާއްޖެ ތިން ސަރަހައްދަކަށް ބަހާލައިގެން ކުޅިވަރު ކުރިއެރުވުމަށް ރޭވިފައިވެއެވެ.
ސްޓެލްކޯގެ ސެމިނާ ހޯލުގައި ބޭއްވުނު ޚާއްޞަ ރަސްމިއްޔާތެއްގައި މި ޕްލޭން ހުށަހަޅުއްވައިދެއްވީ އެމެރިކާގެ ދެ ތަޖުރިބާކާރުން ކަމަށްވާ ސްޓީވް ރޯޝް އާއި މެތިއު ޖޭ. ރޮބިންސަންއެވެ. މި ދެ ބޭފުޅުންނަކީ އިންޓަނޭޝަނަލް ކޯޗިންގ އެންރިޗްމަންޓް ސެޓިފިކެޓް ޕްރޮގްރާމް (އައިސީއީސީޕީ)ގެ މެންބަރުންނެވެ.
ކުޅިވަރާއި ހަށިހެޔޮކަމާ ބެހޭ ވުޒާރާއިން މައުލޫމާތު ދިން ގޮތުގައި ޖުމްލަ 20 އަހަރަށް ބަހާލައިގެން ކުރިއަށް ގެންދިއުމަށް ރޭވިފައިވާ މި ޕްލޭން ތަންފީޒުކުރާނީ ހަތަރު ފޭސްއަކަށް ބަހާލައިގެންނެވެ. މި ޕްލޭނުގެ މައިގަނޑު އަމާޒަކީ 2030 އަދި 2034 ވަނަ އަހަރުގެ އޭޝިއަން ގޭމްސްގައި ޕޯޑިއަމް ފިނިޝް ނުވަތަ މެޑެއްޔެއް ހޯދުމެވެ. އަދި 2036 އަދި 2040 ވަނަ އަހަރުގެ އޮލިމްޕިކްސްގައި ދިވެހި އެތުލީޓުން މެޑަލް ހޯދުން ކަމަށް އެ ވުޒާރާއިން ބުނެއެވެ.
މި ޕްލޭނާ ގުޅޭގޮތުން ކަމާބެހޭ ފަރާތްތަކާއެކު ދެ ދުވަހުގެ ވަރކްޝޮޕެއް ބޭއްވުމަށްވެސް ހަމަޖެހިފައިވެއެވެ. މި ވަރކްޝޮޕްގައި ކުޅިވަރު އެސޯސިއޭޝަންތަކާއި، ކޮމިޝަނަރ އޮފް ސްޕޯޓްސް، ސްޕޯޓްސް ކައުންސިލް، މޯލްޑިވްސް އޮލިމްޕިކް ކޮމިޓީ، ސިޓީ ކައުންސިލްތައް، ޞިއްޙަތާބެހޭ ވުޒާރާގެ އިތުރުން ތަޢުލީމީ ވުޒާރާގެ ބޭފުޅުން ބައިވެރިވެވަޑައިގަންނަވާނެކަމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން ބުނެއެވެ.