ސްޕެނިޝް ލަ ލީގާގައި ރޭ ކުޅުނު މެޗެއްގައި ސެލްޓާ ވީގޯ އާ ދެކޮޅަށް ރެއާލް މެޑްރިޑް ވަނީ 3-2 ގެ ނަތީޖާއަކުން މޮޅުވެއްޖެއެވެ. މި ނަތީޖާ އާއި އެކު ރެއާލް މެޑްރިޑުން ވަނީ އެއްވަނައިގައި އޮތް ބާސެލޯނާ އާއި ދެމެދު އޮތް ޕޮއިންޓުގެ ފަރަގު ހަތަރު ޕޮއިންޓަށް ކުޑަކޮށްފައެވެ.
ސެންޓިއާގޯ ބަރުނަބިއު ސްޓޭޑިއަމްގައި ކުޅުނު މި މެޗުގައި ރެއާލް މެޑްރިޑްގެ ފަރާތުން ފުރަތަމަ ލަނޑު ޖެހީ 33 ވަނަ މިނެޓުގައި އާދާ ގުލާއެވެ. އޭގެ ފަހުން ޖޫޑް ބެލިންހަމްގެ އެހީތެރިކަމާއެކު ކިލިއަން އެމްބާޕޭ ވަނީ ދެވަނަ ލަނޑު ޖަހާފައެވެ. ދެވަނަ ހާފުގެ ތިންވަނަ މިނެޓުގައި އެމްބާޕޭ އިތުރު ލަނޑެއް ޖަހައި ރެއާލް މެޑްރިޑްގެ ލީޑު 3-0 އަށް ބޮޑުކުރިއެވެ.
ނަމަވެސް ދެވަނަ ހާފުގައި ސެލްޓާ ވީގޯއިން ވަނީ އެ ޓީމުގެ ކުޅުން ރަނގަޅުކޮށް، 69 ވަނަ މިނެޓުގައި ހަވީ ރޮޑްރިގޭޒް އަދި 76 ވަނަ މިނެޓުގައި ވިލިއޮޓް ސްވެޑްބަރގް މެދުވެރިކޮށް ދެ ލަނޑު ޖަހާފައެވެ. މީގެ އިތުރުން ސެލްޓާ ވީގޯގެ ޕަބްލޯ ދުރާންއަށް މެޗުގެ ނަތީޖާ އެއްވަރުކުރުމުގެ ފުރުސަތެއްވެސް ލިބުނު ނަމަވެސް، ރެއާލް މެޑްރިޑްގެ ގޯލްކީޕަރު ޓިބޯ ކޯޓުއާ އެ ފުރުސަތު ނައްތާލިއެވެ.
މި މޮޅުވުމާއެކު ރެއާލް މެޑްރިޑް ވަނީ 34 މެޗުން 75 ޕޮއިންޓް ހޯދައި، ލީގު ތާވަލުގެ ދެވަނައިގައި ހިފަހައްޓާފައެވެ. އެއްވަނައިގައިވާ ބާސެލޯނާއަށް 79 ޕޮއިންޓް ލިބިފައިވާއިރު، ދެ ޓީމަށްވެސް ބާކީ އޮތީ ހަތަރު މެޗެވެ.
އަންނަ ހަފުތާގައި މި ދެ ޓީމު ބައްދަލުކުރާ މެޗަކީ ލީގުގެ ޗެމްޕިއަންކަން ކަނޑައެޅިގެން ހިނގައިދާނެ މެޗެކެވެ. އެ މެޗުން ބާސެލޯނާ މޮޅުވެއްޖެނަމަ، އެ ޓީމަށް ލީގުގެ ޗެމްޕިއަންކަން ޔަގީންވާނެއެވެ. ނަމަވެސް ރެއާލް މެޑްރިޑް މޮޅުވެއްޖެނަމަ، ލީގު ހޯދުމުގެ ފުރުސަތު އެ ޓީމަށް ބޮޑުވެގެންދާނެއެވެ.