ކ. ދިއްފުށި ކައުންސިލުން އިންތިޒާމުކޮށްގެން ބާއްވާ “ދިއްފުށި ކައުންސިލް ފުޓްސަލް ފިއެސްޓާ 2024” ގައި ބައިވެރިވުމަށް ހުޅުވާލައިފި އެވެ
މި މުބާރާތާއި ގުޅޭ މައުލޫމާތު ދެއްވަމުން ދިއްފުށީ ކައުންސިލްގެ ރައީސް އިބްރާހިމް ސުނިލް ވަނީ އޮކްޓޯބަރު 31 ވަނަ ދުވަހު ފަށާ މި މުބާރާތަކީ ދިއްފުށީގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކޮށް، ކުޅިވަރުގެ ރޫޙު އަށަގެންނެވުމާއެކު، ފުޓްސަލްގެ މޮޅު ކުޅުންތެރިން އުފެއްދުމުގެ މަޤްޞަދުގައި ބޭއްވޭ މުބާރާތެއް ކަމަށް ވިދާޅުވެފައެވެ. އަދި މިއީ ދިއްފުށީގައި މި މުބާރާތް ބޭއްވޭ ފުރަތަމަ އަހަރުކަން ވެސް ސުނިލް ވަނީ ފާހަގަކުރައްވާފަ އެވެ.
މި މުބާރާތުގައި އަންހެނުންނާއި ފިރިހެނުންގެ ޑިވިޜަންތައް ހިމެނޭއިރު، ކޮންމެ ޑިވިޜަނެއްގެ ޗެމްޕިއަން ޓީމަށް 30,000 ރުފިޔާގެ ފައިސާގެ އިނާމާއި، ރަނަރަޕް ޓީމަށް 10,000 ރުފިޔާގެ ފައިސާގެ އިނާމް ދިނުމަށް ވަނީ ހަމަޖެހިފައެވެ.
މުބާރާތުގައި ބައިވެރިވުމަށް ރަޖިސްޓަރީ ކުރުމުގެ ފުރުޞަތު މިހާރު ވަނީ ހުޅުވާލާފައެވެ. ފުޓްސަލް ފިއެސްޓާ ޤަވާއިދު ބުނާގޮތުން މުބާރާތުގައި ބައިވެރިވެވޭނީ ދިއްފުށްޓަށް ނިސްބަތްވާ ޓީމުތަކަށެވެ. ނަމަވެސް، ކޮންމެ ޓީމަކަށްވެސް ބޭރުގެ 2 ކުޅުންތެރިން ހިމެނުމުގެ ފުރުޞަތު އޮތީ ހުޅުވާލާފައެވެ. އަދި މުބާރާތުގައި ބައިވެރިވުމަށް ރަޖިސްޓްރޭޝަން ފޯމު ދިއްފުށި ކައުންސިލް އިދާރާއިން ލިބެން ހުންނާނެކަމަށް ސުނިލް ވަނީ ވިދާޅުވެފައެވެ. ރަޖިސްޓަރީ ވުމުގެ އެންމެ ފަހު ތާރީޚަކީ އޮކްޓޯބަރު 15 އެވެ.
މުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ފީފާގެ “ފުޓްސަލް އޮފް ދި ގޭމް” ” ޤަވާއިދުގެ ދަށުންނެވެ. އެހެންނަމަވެސް، މުބާރާތް ހިންގުމަށް ފަސޭހަކުރުމުގެ ގޮތުން، މުބާރާތުގެ ހިންގާ ކޮމިޓީން ބައެއް ކުދިކުދި ބަދަލުތައް ގެނެސްފައިވާކަން ފާހަގަކުރެވެއެވެ. މި މުބާރާތުގެ ހުރިހާ މެޗެއްވެސް ކުރިއަށް ގެންދިއުމަށް ހަމަޖެހިފައިވަނީ ދިއްފުށި ފުޓްސަލް ސްޓޭޑިއަމްގައެވެ.
ސުނިލް އިތުރަށް ވިދާޅުވިގޮތުގައި މިއީ ކައުންސިލްގެ ފަރާތުން ކުރިއަށް ގެންދާ މުބާރާތެއް ނަމަވެސް، މުބާރާތް ކާމިޔާބު ކުރުމަށްޓަކައި ރަށުގެ ވިޔަފާރިވެރިންނާއި އަމިއްލަ ފަރާތްތަކުގެ އިތުރުން، ކުޅިވަރުގައި ހަރަކާތްތެރިވާ ރަށުގެ ގިނަ ޒުވާނުންގެ ދައުރު ވަރަށް ބޮޑެވެ.
މި މުބާރާތުގެ ހުރިހާ މެޗުތަކެއް ކައުންސިލްގެ އޮފިޝަލް ފޭސްބުކް ޕޭޖުގައި ލައިވްކޮށް ދެއްކުމަށް ވަނީ ހަމަޖެހިފައެވެ. މުބާރާތުގެ ހުޅުވުމާއި ނިންމުން އަދި މެޗުތައް ކުރިއަށް ގެންދިއުމަށް ތައްޔާރީތައް މިހާރު ދަނީ ކުރެވެމުންނެވެ.
“ކައުންސިލްގެ އުއްމީދަކީ މި މުބާރާތުގައި ގިނަ ޓީމުތަކަކުން ބައިވެރިވެ، ކާމިޔާބުކަމާއެކު މުބާރާތް ނިންމާލުން” ސުނިލް ވިދާޅުވި އެވެ.
ދިއްފުށްޓަކީ ކުޅިވަރުގެ މައިދާނުގައި ފާހަގަކޮށްލެވޭ ގިނަ ފަރާތްތަކެއް ނިސްބަތްވާ ރަށެކެވެ. މިގޮތުން، ޤައުމީ ފުޓްބޯޅަ ޓީމުގެ އަޙްމަދު ރިޒުވާން އަދި ޒައިން ޒަފަރު އަކީވެސް ދިއްފުއްޓަށް ނިސްބަތްވާ ކުޅުންތެރިންނެވެ.
ދިއްފުށި ކައުންސިލް ފުޓްސަލް ފިއެސްޓާ 2024 އަކީ ދިއްފުށީގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން، ކުޅިވަރުގެ ރޫޙު އަށަގެންނެވުމަށް މުހިންމު ދައުރެއް އަދާކުރާނެ މުބާރާތެއް ކަމަށް ބެލެވެއެވެ. އަދި މި މުބާރާތުގެ ސަބަބުން ދިއްފުށީގެ ކުޅިވަރުގެ ދާއިރާއަށް އިތުރު ކުރިއެރުންތަކެއް ލިބި، ޤައުމީ ފެންވަރުގައި ވާދަކުރާނެ އިތުރު ކުޅުންތެރިން އުފެދިގެން ދާނެކަމަށް އުންމީދު ކުރެވެއެވެ.
މި މުބާރާތުގެ އޮންލައިން މީޑިއާ ޕާޓްނަރަކީ ހިރާސް އޮންލައިނެވެ.