ބްރޯޑްކާސްޓިން ދާއިރާގައި މަސައްކަތްކުރާ ނޫސްވެރިންގެ ފެންވަރު މަތިކޮށް، ރަނގަޅު ފެންވަރުގެ ހިދުމަތެއް ފޯރުކޮށްދިނުމަށް މަގުފަހިކުރުމުގެ ގޮތުން މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ނޫސްވެރިން އެކްރެޑިޓް ކުރުމާ ބެހޭ އުސޫލެއް އެކުލަވާލައި އާންމުކޮށްފި އެވެ.
މި އުސޫލުގެ ދަށުން “ޕްރެސް ފާސް” ދޫކުރެވޭނީ އެޑިޓަރުންނާއި، ރިޕޯޓަރުންނާއި، ޕްރެޒެންޓަރުންނާއި، ލިޔުންތެރިންނާއި، ކޮލަމިސްޓުންނާއި، ފޮޓޯ އަދި ވީޑިއޯ ޖާނަލިސްޓުންނަށް ކަމަށާއި، އެކްރެޑިޓޭޝަން ލިބޭ ފަރާތްތަކަކީ އެމްކިޔުއޭ ލެވެލް 3 ގެ ސަނަދެއް ނުވަތަ ނޫސްވެރިކަމުގެ ދާއިރާގައި މަދުވެގެން ތިން އަހަރުދުވަހުގެ ތަޖުރިބާ ލިބިފައިވާ ފަރާތްތަކަށް ވާންޖެހޭނެ ކަމަށް ބްރޯޑްކޮމުން ބުނެއެވެ.
އުސޫލަށް އަމަލުކުރަން ފަށާނީ އުސޫލު ޝާއިއުކުރާތާ ހަ މަސްދުވަސް ފަހުން ކަމަށާއި، އެކްރެޑިޓް ކާޑު ދޫކުރެވޭނީ ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްއަށް އަހުލުވެރިވެފައިވާ މިންވަރާއި، ކުޑަކުދިންނާއި އަންހެނުންގެ ހައްގުތައް ހިމާޔަތްކުރުމުގައި އަމަލުކުރަންޖެހޭ އުސޫލުތަކަށް އަހުލުވެރިވެފައިވާ މިންވަރު ބެލުމަށްފަހު ކަމަށްވެސް ބްރޯޑްކޮމުން މައުލޫމާތު ދެއެވެ.