އަންނަ އާދިއްތަ ދުވަހުގެ ރޭ ދުނިޔޭގެ އެކި ހިސާބުތަކުގައި ހަނދުކޭތަ ހިފާއިރު، ރާއްޖެ ހިމެނޭ ގޮތަށް އޭޝިއާގެ ބޮޑު ސަރަހައްދަކަށް ‘ބްލަޑް މޫން’ އެއް ފެންނާނެ ކަމަށް ފަލަކީ މާހިރުން ލަފާކޮށްފިއެވެ.
ހަނދުކޭތަ ހިފަނީ އިރާއި ބިމާއި ހަނދު ސީދަލަށް އެތުރި، އިރުގެ އަލިކަމުގެ ސަބަބުން ހަނދަށް ދުނިޔޭގެ ހިޔަނި އެޅުމުގެ ސަބަބުންނެވެ. އަދި ހަނދު ފުސް ރަތް ކުލައެއްގައި ފެންނަނީ ނުވަތަ “ބްލަޑް މޫން” އަކަށް ވަނީ އިރުގެ ބައެއް ދޯދިތައް ދުނިޔޭގެ ޖައްވުން ގޮސް ހަނދަށް އެޅޭތީއެވެ.
ފަލަކީ އިލްމުގެ ތަޖުރިބާކާރު ޢަބްދުﷲ ރަޝީދު (ލިނެޓް) ވިދާޅުވި ގޮތުގައި، މި ހަނދުކޭތަ އެންމެ ފުރިހަމައަށް ފެންނާނެ އެއް ގައުމަކީ ރާއްޖެއެވެ. “ސަބަބަކީ، މި ކޭތަ އެންމެ ފުރިހަމަވާ ވަގުތު ކަމަށްވާ މާލޭގަޑިން ރޭގަނޑު 11:12 ގައި ހަނދު ހުންނާނީ މަލޭ އޮންނަ ޠޫލު (ލޮންޖިޓިޔުޑް) އަށް ވުރެން 13 ދަރަޖަ އިރުމަތީގައި ކަމަށްވެފައި، ހަ ދަރަޖަ ދެކުނު ޠޫލު (ލެޓިޓިޔުޑް) އެއްގައި ކަމަށްވުމުން ހަނދު ފެންނާނީ މާލެއަށް މެދު އުޑުގައި ހުންނައިރު ހުންނަ ފަދަ ގޮތެއްގައި މެދުއުޑާ ދާދި ކައިރީގައި,” ކަމަށް އޭނާ ވިދާޅުވިއެވެ.
ރަޝީދު ދެއްވި މައުލޫމާތުގައި، ލޮލަށް ފެންނަ ކޭތަ ހިފަން ފަށާނީ މާލޭ ގަޑިން ރޭގަނޑު 9:27 ގައި ކަމަށާއި، ކޭތަ ވީއްލޭނީ 12:56 ގައި ކަމަށް ލަފާކުރައްވައެވެ. އަދި އެރޭ ވިއްސާރައެއް ނުވާނެ ކަމަށް ލަފާކުރެވުނު ނަމަވެސް، އުޑުމަތި ސާފުނުވެ ހިނގައިދާނެ ކަމަށްވެސް އޭނާ ވިދާޅުވިއެވެ.
ކޭތަ ހިފާ ދުވަސްތަކުގައި ރާއްޖޭގައި ކޭތަ ނަމާދު ކުރުމަކީ އާންމު ކަމެކެވެ. މިފަދަ ޤުދުރަތީ މަންޒަރުތައް ބެލުމަށް ޝައުޤުވެރިވާ ފަރާތްތަކަށް މި ނާދިރު މަންޒަރު ބެލުމުގެ ފުރުސަތު މިފަހަރު ލިބިގެންދާނެއެވެ.