ހަމާސްއިން ބަންދުކޮށްފައި ތިބި އިސްރާއިލުގެ އަސީރުން ދޫކޮށްލުމަށް ތައްޔާރުވަމުންދާއިރު، ޣައްޒާއަށް ފޯރުކޮށްދޭ އިންސާނީ އެހީގެ މިންވަރު އިތުރުކުރުމަށް އދ. އިން ވަނީ ނިންމާފައެވެ. އެގޮތުން ހުދުނާ އެއްބަސްވުމުގެ ދަށުން ކޮންމެ ދުވަހަކު 400 ޓްރަކުގެ އެހީ ޣައްޒާއަށް ވެއްދުމަށް ވަނީ ހަމަޖެހިފައެވެ.
އދ. އިން ބުނާ ގޮތުގައި ޣައްޒާގައި ކުރިމަތިވެފައިވާ އިންސާނީ ހާލަތަށް އެކަށީގެންވާ އެހީ ފޯރުކޮށްދިނުމަށް މަދުވެގެން ދުވާލަކު 600 ޓްރަކުގެ އެހީ ބޭނުންވާނެއެވެ. މިހާރު ވަނީ މި އަދަދަށް އެހީގެ މިންވަރު އިތުރުކުރުމަށް ރޭވިފައެވެ.
އެމެރިކާގެ ރައީސް ޑޮނަލްޑް ޓްރަމްޕް މިއަދު އިޖިޕްޓަށް ޒިޔާރަތްކުރުމަށް ހަމަޖެހިފައިވާއިރު، ހަމަސްއިން ވަނީ ބަންދުގައި ތިބި އަސީރުންމިއަދު ދުވަހު ދޫކޮށްލާނެކަމަށް އިއުލާނުކޮށްފައެވެ. ޝަރަމް އައް-ޝެއިޚްގައި ބޭއްވުމަށް ހަމަޖެހިފައިވާ މަތީ ފެންވަރުގެ ސަމިޓެއްގައި “ޣައްޒާގެ ހަނގުރާމަ ނިމުމަކަށް ގެނައުމުގެ” ލިޔުމެއްގައި ސޮއިކުރެވޭނެ ކަމަށް އިޖިޕްޓްގެ ޚާރިޖީ ވުޒާރާއިން ބުނެފައިވެއެވެ.
ޔުނިސެފްއިން ވަނީ ކުޑަކުދިންގެ މަރުގެ އަދަދު ބޮޑުތަނުން އިތުރުވެދާނެ ކަމުގެ އިންޒާރު ދީފައެވެ. އޮކްޓޯބަރު 2023 އިން ފެށިގެން އިސްރާއީލުން މަޖުބޫރުކުރި ބަނޑަހައިކަމުގެ ސަބަބުން މިހާތަނަށް 460 ފަލަސްތީނު ރައްޔިތުން ވަނީ މަރުވެފައެވެ.
ޣައްޒާގެ ހޮސްޕިޓަލްތަކުގެ ޑިރެކްޓަރ ޖެނެރަލް މުހައްމަދު ޒަގޫތު ވިދާޅުވި ގޮތުގައި ބޭސްފަރުވާގެ ތަކެއްޗާއި ބޭހުގެ ދަތިކަން ވަރަށް ބޮޑަށް ކުރިމަތިވެފައިވާއިރު، އަދިވެސް މި ތަކެތި ލިބިފައެއް ނުވެއެވެ. އަދި މެޑިކަލް ޓީމުތައް ޣައްޒާއަށް ވަނުމަށް އިސްރާއީލުން ހުރަސްއަޅަމުންދާ ކަމަށްވެސް އޭނާ ވިދާޅުވިއެވެ.