ދުނިޔޭގެ އެންމެ ބޮޑު ކްރެޑިޓް ރޭޓިން އެޖެންސީ، މޫޑީޒް އިން ރާއްޖޭގެ ސޮވަރިން ކްރެޑިޓް ރޭޓިން ސީއޭއޭ2 ގައި ދަމަހައްޓާފައިވާއިރު، ކުރިން އޮތް “ނެގެޓިވް” އައުޓްލުކް ވަނީ “ސްޓޭބަލް” އަށް ބަދަލުކޮށްފަ އެވެ. މިކަމާ ގުޅިގެން ފިނޭންސް މިނިސްޓަރު މޫސާ ޒަމީރު ވިދާޅުވީ، މިއީ ސަރުކާރުން ހަރުދަނާކަމާއެކު ތަންފީޒުކުރަމުންދާ ފިސްކަލް ސިޔާސަތުތަކުގެ ކާމިޔާބީ ކަމަށާއި، މި އިސްލާހީ މަސައްކަތްތައް ކުރިއަށް ގެންދިއުމުގެ ޔަގީންކަން ދެއްވާ ކަމަށެވެ.
މޫޑީޒް އިން ރާއްޖޭގެ ކްރެޑިޓް އައުޓްލުކަށް މި ކުރިއެރުން ދީފައިވަނީ، މިދިޔަ އެއް އަހަރުގެ ތެރޭގައި ރާއްޖެއިން އަޅާފައިވާ ފިޔަވަޅުތަކުގެ ސަބަބުން ދަރަނި ދެއްކުމުގެ ގާބިލުކަން އިތުރުވެ، މެކްރޮފިސްކަލް ހާލަތު ރަނގަޅުވެފައިވާކަން ފާހަގަކުރެވުމާ ގުޅިގެންނެވެ. ފިނޭންސް މިނިސްޓްރީން ބުނެފައިވާ ގޮތުގައި، މި ބަދަލަކީ ފިސްކަލް އަދި މަނިޓަރީ ސިޔާސަތުތަކުގެ ނަތީޖާއެއްގެ ގޮތުން އިގްތިސާދީ ހާލަތު ރަނގަޅުވެފައިވާކަން ދައްކުވައިދޭ ކަމެކެވެ.
މިނިސްޓަރު ޒަމީރު ވަނީ ސަރުކާރުގެ އިސްލާހީ މަސައްކަތްތައް ފާހަގަކުރައްވައި ވާހަކަފުޅު ދައްކަވާފަ އެވެ. އޭނާ ވިދާޅުވީ، ބޭރުގެ ލިކުއިޑިޓީ ރަނގަޅުކޮށް، ޑޮލަރުގެ އާމްދަނީ އިތުރުކޮށް، ސޮވަރިން ޑިވެލޮޕްމަންޓް ފަންޑު (އެސްޑީއެފް) ހަރުދަނާކުރުމުގެ އިތުރުން، ޒިންމާދާރުކަމާއެކު ބަޖެޓު މެނޭޖުކުރުމުގެ ސަބަބުން ބޭރުގެ ޕްރެޝަރުތައް ކުޑަވެ، އިގްތިސާދީ މިސްރާބަށް އާ އިތުބާރެއް އުފެދިފައިވާ ކަމަށެވެ. މޫޑީޒް އިން ފާހަގަކުރި ގޮތުގައި، މި ސިޔާސަތުތަކުގެ ސަބަބުން މި މަހުގެ 9 ވަނަ ދުވަހާ ހަމައަށް އެސްޑީއެފްގެ ބޭރު ފައިސާގެ ބެލެންސް މިދިޔަ އަހަރުގެ 15 މިލިއަން ޑޮލަރުން 126 މިލިއަން ޑޮލަރަށް ވަނީ އިތުރުވެފަ އެވެ.
ބޭރު ފައިސާގެ ލިކުއިޑިޓީ ރަނގަޅުކުރުމަށް ސަރުކާރުން ވަނީ މުހިންމު ފިޔަވަޅުތަކެއް އަޅާފަ އެވެ. މިގޮތުން، އެއާޕޯޓް ޓެކުހާއި ފީ، ގްރީން ޓެކްސް އަދި ޓީޖީއެސްޓީގެ ރޭޓުތައް މުރާޖައާކޮށް، ބޭރު ފައިސާގެ ގާނޫނާއި ގަވާއިދުތައް ހަރުދަނާކޮށް ތަންފީޒުކޮށްފައި ވެއެވެ. މީގެ ނަތީޖާއެއްގެ ގޮތުން ރަސްމީ ރިޒާވްގެ ހާލަތު ވަނީ ރަނގަޅުވެފަ އެވެ. މޫޑީޒްގެ ބަޔާނުގައި، ސަރުކާރުން މި އަހަރުގެ ބަޖެޓު ތަންފީޒުކުރުމުގައި ހަރަދުތައް ކޮންޓްރޯލްކޮށް، ބަޖެޓް ޑެފިސިޓް ކުޑަކުރުމަށް ކުރަމުންދާ މަސައްކަތްތައް ވެސް ވަނީ ފާހަގަކޮށްފަ އެވެ.



