ސަރުކާރު ހިންގާ އަދި ރައްޔިތުންގެ މަޖިލީހުގެ ސުޕަ މެޖޯރިޓީ އޮންނަ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމެންޓްރީ ގްރޫޕުން، ސްރީ ލަންކާ އަށް ކުރިމަތިވި ތޫފާނުގެ ކާރިސާއަށް އެހީވުމުގެ ގޮތުން 300،000.ރ (ތިން ލައްކަ ރުފިޔާ) ހަދިޔާކޮށްފި އެވެ. މި އެހީ ހަވާލުކުރީ ޕީއެސްއެމާއި ބައެއް އަމިއްލަ މީޑިއާތައް ގުޅިގެން މިހާރު ކުރިއަށް ގެންދާ ޓެލެތޯންގެ ތެރެއިންނެވެ.
ތޫފާން ދީތުވާ އެރުމުގެ ސަބަބުން ލަންކާގެ އެތައް މިލިއަން މީހުން ފެންބޮޑުވުމުގެ ހާލުގައި ޖެހިފައިވާތީ، އެ ގައުމުގެ ރައްޔިތުންނަށް އެހީތެރިވުމުގެ ގޮތުން ކުރިއަށްގެންދާ “ސިލޯނާ އެކު ދިވެހިން” ޓެލެތޯންގައި، ޕީއެންސީގެ ފަރާތުން އެ ފައިސާގެ ޗެކް ހަވާލުކޮށްދެއްވީ ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެވެ. ޗެކް ބަލައިގަތީ ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު އަބްދުﷲ ޔާމީން ރަޝީދެވެ.
ޗެކް ހަވާލުކޮށްދެއްވުމަށް ފަހު ޓެލެތޯންގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ސްރީލަންކާ އަކީ ދިވެހިންނާ ވަރަށް ގާތް އުޚުއްވަތްތެރި ގައުމެއް ކަމަށެވެ. އަދި އެއީ ދިވެހިން އެންމެ ގިނައިން ދަތުރުކޮށް އުޅޭ ގައުމު ކަމަށާއި، އެއް ގައުމަކުން އެންމެ ގިނަ މީހުން ރާއްޖޭގައި ދިރިއުޅޭ ގައުމަކީ ވެސް ސްރީ ލަންކާ ކަން އެ މަނިކުފާނު ފާހަގަކުރެއްވި އެވެ.
އަބްދުއްރަހީމް އިތުރަށް ވިދާޅުވީ، ކާރިސާއާ އެކު ލަންކާއިން އެހެން ގައުމުތަކުގެ އެހީތެރިކަމަށް އެދުމުން އެންމެ ފުރަތަމަ އިޖާބަ ދިނީ ރާއްޖޭން ކަން ރާއްޖޭގައި ހުންނަވާ ލަންކާގެ ސަފީރު ފާހަގަކުރެއްވި ކަމަށެވެ. އެކަމުން ދޭހަވަނީ ރައީސް ޑރ. މުހައްމަދު މުއިއްޒުގެ ސަރުކާރުން އަވަށްޓެރި ގައުމުތަކާ އެކު ގެންގުޅޭ ހާރިޖީ ސިޔާސަތުގެ ހަރުދަނާކަން ކަމަށް ވެސް އަބްދުއްރަހީމް ވިދާޅުވި އެވެ.
ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ވިދާޅުވީ ސްރީލަންކާ އަކީ ހަމަ އެކަނި އަވަށްޓެރި ގައުމެއްގެ އިތުރުން ވަރަށް ގިނަ ދިވެހި އާއިލާތައް ދިރިއުޅޭ ގައުމެއް ކަމަށެވެ. އަދި ލަންކާ އަށް ކުރިމަތިވި ހިތާމައިގައި ދިވެހިން ބައިވެރިވަނީ ދިވެހިންނަށް ކުރިމަތިވި ހިތާމައެއްގެ ގޮތޮގައި ކަމަށް ވެސް ފަލާހު ވިދާޅުވި އެވެ. އެގޮތުން، ކޮވިޑް-19ގެ އިގުތިސާދީ ކާރިސާއަށް ފަހު ލަންކާ އަރައިގަންނަމުންދަނިކޮށް ދިމާވި މި ހާދިސާގައި، ދިވެހި ހުރިހާ ރައްޔިތުން ވެސް އެ ހިތާމައިގައި ބައިވެރިވާ ކަމަށް އޭނާ ވިދާޅުވި އެވެ.