މާލެ ސިޓީގެ މާފަންނު ދެކުނު ދާއިރާގެ ކައުންސިލު ގޮނޑިއަށް ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓާއި މާލޭގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އެ ދާއިރާ ގޮނޑިއަށް ވާދަކުރައްވާ ކެންޑިޑޭޓުގެ ކެމްޕެއިން ޖަގަހަ ހުޅުވައިފިއެވެ.
މި ކެމްޕެއިން ޖަގަހަ ހުޅުއްވައިދެއްވީ ފަސްޓް ލޭޑީ ސާޖިދާ މުޙައްމަދެވެ.
ކެމްޕެއިން ޖަގަހަ ހުޅުވުމަށް ރޭ ރަސްމިއްޔާތުގައި ދެއްކެވި ވާހަކަފުޅުގައި ފަސްޓް ލޭޑީ ސާޖިދާ ވިދާޅުވީ ފުރަތަމަ ވިސްނުމުގައިވެސް ސަރުކާރާ ދެކޮޅަށް މަސައްކަތްކުރުމުގެ ވިސްނުމުގައި މަގާމަށް އަންނަ ބަޔަކު، މަގާމުގައި ތިބެގެން ސަރުކާރަށް އެއްބާރުލުން ނުދޭނަމަ، އެމީހުންގެ ފަރާތުން ރައްޔިތުންނަށް އެއްވެސް ފައިދާއެއް ނުލިބޭނެ ކަމަށެވެ.
ހަމައެހެންމެ، އަދުގެ ރައީސަކީ ހީވާގި ވެރިއެއްކަން ރައްޔިތުން ޤަބޫލުކުރައްވާނެކަމަށާއި، ކައުންސިލްތަކަށް ބޭނުންވަނީ ހިވާގި ވެރިއަކާއެކު މަސައްކަތްކުރާނެ ކައުންސިލްތަކެއްކަމަށް އެ ކަމަނާ ވިދާޅުވިއެވެ.
މީގެއިތުރުން ކައުންސިލަކީ ރައްޔިތުންގެ އިހުސާސްތައް އެންމެ ކައިރިން ދެނެގަނެ، އެންމެ ގާތުން ރައްޔިތުންނަށް ހިދުމަތް ފޯރުކޮށްދެވޭނެ މުއައްސަސާކަން ފާހަގަކުރައްވަމުން ސާޖިދާ ވިދާޅުވީ ރައްޔިތުންގެ ކަންބޮޑުވުންތަކާއި ބޭނުންތައް ސީދާ ސަރުކާރާ ހަމައަށް ގެނެސްދެވޭނެ ބަޔަކު ކައުންސިލުތަކުގައި ތިބުމަކީ އެކަމުން ރައްޔިތުންނަށް ވަރަށް ބޮޑަށް ފައިދާކުރާނެ ކަމެއް ކަމަށެވެ.