ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވަޢުދުފުޅާ އެއްގޮތަށް، 1447 ވަނަ އަހަރުގެ ރަމަޟާން މަހަށް ސަރުކާރުން ދޭ ރޯދަ ހަދިޔާ ބެހުމުގެ މަސައްކަތުގެ ތެރެއިން ރޭގެ ނިޔަލަށް 12,274 ގޭބިސީއަކަށް މަސްދަޅު ކޭސް ދޫކޮށްފިއެވެ. ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން ސަރުކާރު ހިއްސާވާ ކުންފުނިތަކާ ގުޅިގެން މި މަސައްކަތް ފަށާފައިވަނީ މިދިޔަ ހޮނިހިރު ދުވަހުގެ ރޭގައެވެ.
މާލެ ސަރަހައްދުގައި މަސްދަޅު ދޫކުރުމުގެ މަސައްކަތް ކުރިއަށްދަނީ ކޮންމެ ޑޮމެސްޓިކް މީޓަރަކީ ގޭބިސީއެއްގެ ގޮތުގައި ބަލައިގެންނެވެ. މިގޮތުން މާލެ، ވިލިމާލެ އަދި ހުޅުމާލެ ހިމެނޭހެން ރަޖިސްޓްރީކޮށްފައިވާ 65,230 މީޓަރުގެ ތެރެއިން މިހާތަނަށް 18.8 އިންސައްތަ ގޭބިސީއަށް ވަނީ މަސްދަޅު ކޭސް ހަވާލުކޮށްފައެވެ. އެންމެ ގިނަ ކޭސް ދޫކޮށްފައިވަނީ ގަލޮޅު ދަނޑުގައި ގާއިމްކޮށްފައިވާ މަރުކަޒުތަކުންނެވެ.
މަސްދަޅު ކޭސް ދޫކުރުމުގެ އިންތިޒާމްތައް މާލެ ސަރަހައްދުގެ އެކި ސަރަހައްދުތަކުގައި ވަނީ ހަމަޖައްސާފައެވެ. އެގޮތުން މާލޭގެ ސޯޝަލް ސެންޓަރާއި ދަނޑުތަކުގެ އިތުރުން، ހުޅުމާލޭގެ ދެ ފޭސްއެއްގައި ހުރި ސްކޫލްތަކާއި ޓަވަރުތަކުންނާއި ވިލިމާލޭގެ ވެމްކޯ ސައިޓުން މަސްދަޅު ދޫކުރަމުންދެއެވެ. މި މަސައްކަތް ހަރުދަނާކުރުމަށްޓަކައި ޚާއްޞަ ޕޯޓަލެއް މެދުވެރިކޮށް ކޮންމެ ރެއަކު 300 ޓޯކަން ދޫކުރުމަށް ވަނީ ނިންމާފައެވެ.
މިއަހަރުގެ ރޯދަ ހަދިޔާގެ ގޮތުގައި މުޅި ރާއްޖޭގެ 118,673 ގޭބިސީއަކަށް މަސްދަޅު ކޭސް ދޫކުރުމަށް ސަރުކާރުން ވަނީ އަމާޒު ހިފާފައެވެ. މީގެ ތެރޭގައި އަތޮޅުތަކުގެ 56,918 ގޭބިސީއާއި މާލެ ސަރަހައްދުގެ 61,755 ގޭބިސީ ހިމެނެއެވެ. މިއީ ސަރުކާރަށް އަހަރެއް ފުރުމުގެ މުނާސަބަތުގައި ރައީސުލްޖުމްހޫރިއްޔާ އިޢުލާންކުރެއްވި ފަދައިން، ރައްޔިތުންނަށް ލުއިފަސޭހަކޮށްދިނުމަށް ކުރިއަށްގެންދާ މުހިންމު މަޝްރޫޢެކެވެ.