މިއަހަރުގެ ރަމަޟާން މަހުގެ ފަހު 15 އެއްގައި އުމްރާގެ އަޅުކަން އަދާކުރުމަށް މޯލްޑިވްސް ހައްޖު ކޯޕަރޭޝަނުގެ ހަވާލުގައި ފުރި ފަހު ގްރޫޕް، ސައުދީ އަރަބިއްޔާގެ ޖިއްދާއަށް މިއަދު ހެނދުނު ފޯރައިފިއެވެ.
ސައުދީ އެއާލައިންސްގެ ފްލައިޓެއްގައި ރޭ މެންދަމު 02:20 ހާއިރު ރާއްޖެއިން ފުރި މި ގްރޫޕުގައި ޖުމްލަ 316 އުމްރާވެރިން ހިމެނެއެވެ. މި ފްލައިޓް ޖިއްދާގެ ކިންގް އަބްދުލްއަޒީޒް އިންޓަނޭޝަނަލް އެއާޕޯޓަށް ޖައްސާފައިވަނީ ރާއްޖެ ގަޑިން މިއަދު ހެނދުނު 07:54 ގައެވެ.
ހައްޖު ކޯޕަރޭޝަނުން މައުލޫމާތު ދެއްވާ ގޮތުގައި، އެއާޕޯޓުގެ ރަސްމިއްޔާތުތަކަށްފަހު އުމްރާވެރިން މިހާރު ދަނީ ބަހުގައި މައްކާއަށް ދިޔުމަށް ތައްޔާރުވަމުންނެވެ. މަގުމަތީގެ ޓްރެފިކް ހުރި ގޮތުން، ގާތްގަނޑަކަށް ދެ ގަޑިއިރުގެ ދަތުރަކަށްފަހު އުމްރާވެރިންނަށް މައްކާއަށް ފޯރާނެ ކަމަށް ލަފާކުރެވެއެވެ. އެ ކޯޕަރޭޝަނުން އިތުރަށް ވިދާޅުވީ، ހުރިހާ އުމްރާވެރިންގެ ހާލުވެސް އާންމުގޮތެއްގައި ރަނގަޅު ކަމަށެވެ.
މިއަހަރުގެ ރަމަޟާން މަހާ ދިމާކޮށް ހައްޖު ކޯޕަރޭޝަނުގެ ހަވާލުގައި ޖުމްލަ 553 ފަރާތަކުން އުމްރާގެ އަޅުކަން އަދާކުރުމަށް ވަނީ ހަމަޖެހިފައެވެ. މީގެ ތެރެއިން ފުރަތަމަ ގްރޫޕް ރަމަޟާން މަހުގެ ކުރީކޮޅު ފުރާފައިވާއިރު، މިއަދު ޖިއްދާއަށް ފޯރި ގްރޫޕަކީ ރަމަޟާން މަހުގެ ފަހު ދިހައެއްގެ އަޅުކަމަށް އަމާޒުކޮށްގެން އެ ކޯޕަރޭޝަނުން ފޮނުވި ފަހު ގްރޫޕެވެ.