މި އަހަރުގެ ފިތުރު އީދަށް ސަރުކާރުން އަލަށް ތަޢާރަފްކުރާ ޓެކްސީލައިންގެ ޚިދުމަތް ފެށުމަށް މަސައްކަތް ކުރަމުންދާ ކަމަށް ދަތުރުފަތުރާއި، މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ވިދާޅުވީ، މި ޚިދުމަތަށް ބޭނުންވާ ޓެކްސީތައް މިހާރު ރާއްޖެ ގެނައުމުގެ މަގުމަތީގައިވާ ކަމަށާއި، މި މަހުގެ 18 ވަނަ ދުވަހު ލިމިޓެޑް ސާވިސްތަކަކާއެކު ޚިދުމަތް އިފްތިތާޙް ކުރުމަށް އަމާޒު ހިފާފައިވާ ކަމަށެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޙަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން ޖުމްލަ 150 ކާރު ގެނައުމަށް ވަނީ ނިންމާފައެވެ. ވަޒީރު ވިދާޅުވި ގޮތުގައި މި ޓެކްސީތައް ގެންނަނީ ދެ ބެޗަކަށް ބަހާލައިގެންނެވެ. އެގޮތުން ތައިލޭންޑުން 60 ކާރު ގެންނައިރު، ބާކީ ކާރުތައް ގެންނަނީ ޗައިނާއިންނެވެ. މި ކާރުތަކަކީ ރާއްޖޭގެ ޖަޒީރާ މާޙައުލާއި، މޫދާ ކައިރި ސަރަހައްދުތަކުގައި ދުއްވުމަށް އެކަށޭނެހެން އިލެކްޓްރޯނިކް ވަސީލަތްތަކަށް ބަދަލު ގެނެސްގެން ތައްޔާރުކޮށްފައިވާ އުޅަނދުތަކެކެވެ.
“އަޅުގަނޑަށް އެމްޓީސީސީން ލިބިފައިވާ މައުލޫމާތަކީ މިމަހުގެ 11 ވަނަ ދުވަހު އެއްބެޗު މާލެ އަންނާނެ ކަމަށް. އީދަށް މިކަންތައް ފެށޭތޯ މަސައްކަތް ކުރަނީ. އިރާދަ ކުރެއްވިއްޔާ މިހާރު މިއޮތް ތާވަލާއި އެއްގޮތަށް މިކަންތައް ކުރެވޭތޯ ބަލަނީ،” ޓެކްސީލައިންގެ ޚިދުމަތް ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތަކާ ގުޅޭގޮތުން ވަޒީރު ވިދާޅުވިއެވެ. މި ޚިދުމަތް ފަށައިގަންނައިރު ކުރިއަށްދާނީ ވަކި މިންގަނޑުތަކެއްގެ ތެރެއިން މަރުޙަލާތަކަކަށް ބަހާލައިގެންނެވެ.
ޓެކްސީލައިންގެ ޚިދުމަތް ދިނުމަށްޓަކައި ޖުމްލަ 407 ޑްރައިވަރުން ބޭނުންވާ ކަމަށް ސަރުކާރުން ހާމަކޮށްފައިވެއެވެ. މީގެ ތެރޭގައި 285 ފުލްޓައިމް ޑްރައިވަރުންނާއި 122 ޕާޓްޓައިމް ޑްރައިވަރުން ހިމެނެއެވެ..