ޕަބްލިކް ޕްރައިވެޓް ޕަރޓްނަރޝިޕް (ޕީޕީޕީ) މޮޑެލްގެ ދަށުން އަތްފޯރާ އަގުގައި 5,000 ހައުސިން ޔުނިޓް ގާއިމުކުރުމަކީ ސަރުކާރުގެ ބޮޑު އަމާޒެއް ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު އަބްދުﷲ މުއްތަލިބް ވިދާޅުވެއްޖެއެވެ. ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، ސަރުކާރުގެ “ބޯހިޔާވަހިކަން އެންމެންނަށް” ސިޔާސަތަކީ މުޖުތަމައުގެ ހުރިހާ ފަންތިއަކަށް ބޯހިޔާވަހިކަން ކަށަވަރުކޮށްދިނުމަށް ބައްޓަންކޮށްފައިވާ ސިޔާސަތެއް ކަމަށެވެ.
މި އަމާޒަށް ވާސިލުވުމުގެ ފުރަތަމަ ފިޔަވަހީގެ ދަށުން، ހުޅުމާލެ ތިންވަނަ ފިޔަވަހީގައި 1,000 ހައުސިން ޔުނިޓް ބިނާކުރާނެ ބަޔަކު ހޯދުމަށް މިދިޔަ ހަފްތާގައި ވަނީ އިއުލާނުކޮށްފައެވެ. ވަޒީރު ފާހަގަކުރެއްވި ގޮތުގައި މި މަޝްރޫއު ކުރިއަށްގެންދާނީ “އެފޯޑަބަލް ހޯމް އޯނަޝިޕް” މޮޑެލްއަށެވެ.
“އަޅުގަނޑުމެންގެ އަމާޒަކީ 5,000 އެފޯޑެބަލް ހައުސިން ޔުނިޓު ގާއިމުކުރުން. އެކަމަށް ބިން ވެސް މިހާރު ވަނީ ކަނޑައަޅާފައި. ފުރަތަމަ 1,000 ޔުނިޓަށް ހުޅުވާލީ މާކެޓުގައި ޑިމާންޑު ހުރި މިންވަރު ބެލުމަށް،” ވަޒީރު ވިދާޅުވިއެވެ.
މި މަޝްރޫއަކީ އާންމުކޮށް ބޯހިޔާވަހިކަން ފޯރުކޮށްދޭ އަސާސީ މިންގަނޑަށްވުރެ މަތީ ފަންތިއެއްގެ މަޝްރޫއެއް ކަމަށް ސަރުކާރުން ބުނެއެވެ. މިފަދަ ހައުސިން ޔުނިޓުތައް ބާޒާރަށް ނެރުމުގެ ސަބަބުން، މިހާރު އިންތިހާއަށް ބޮޑުވަމުންދާ ކުލީގެ މައްސަލައަށް އެދެވޭ ހައްލެއް ލިބި، މާކެޓް ކޮންޓްރޯލް ކުރުމަށް ސަރުކާރަށް ފަސޭހަވެގެންދާނެ ކަމަށް ވެސް ވަޒީރު މުއްތަލިބް ފާހަގަކުރެއްވިއެވެ.
ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، މާލެ ސަރަހައްދުގައި 7,900 ހައުސިން ޔުނިޓް އެޅުމަށް ވެސް ވަނީ ނިންމާފައެވެ.