ރާއްޖޭގައި އަލަށް ފެށި ބަންކަރިންގެ ހިދުމަތުން މިހާތަނަށް ދައުލަތަށް ބިލިއަނެއްހާ ރުފިޔާގެ އާމްދަނީއެއް ލިބިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ހާމަކުރައްވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، މިދިޔަ އޭޕްރީލް މަހުގެ ނިޔަލަށް މި ހިދުމަތުން ޖުމްލަ 923.46 މިލިއަން ރުފިޔާ ލިބިފައިވާ ކަމަށެވެ.
މިނިސްޓަރު ސައީދު ފާހަގަކުރެއްވި ގޮތުގައި، ހާއްސަ ބަނދަރެއް ނެތި އޮފްޝޯކޮށް ފެށި މި މަސައްކަތުން ދެ އަހަރެއްހާ ދުވަހުގެ ތެރޭގައި އެއް ބިލިއަން ރުފިޔާއާ ގާތްކުރާ އާމްދަނީއެއް ލިބުމަކީ ބޮޑު ކުރިއެރުމެކެވެ. އަދި މި ހިދުމަތަށް ބޭނުންކުރާ ތެލުގެ 90 އިންސައްތައަކީ ރާއްޖެއަށް އަލަށް އެތެރެކުރަން ފެށި ތެޔޮ ކަމަށާއި، މީގެ ތެރޭގައި އެންމެ ބޮޑު ހިއްސާއެއް އޮތީ އަލަށް ތައާރަފްކުރި ލޯ ސަލްފަ އޮއިލްއަށް ކަމަށްވެސް އޭނާ ވިދާޅުވިއެވެ.
އެސްޓީއޯގެ ތަފާސްހިސާބުތަކަށް ބަލާއިރު، ބަންކަރިންގެ ތެރެއިން ވިއްކާ ތެލުގެ މިންވަރު އަންނަނީ އިތުރުވަމުންނެވެ. އެގޮތުން މިއަހަރުގެ ފުރަތަމަ ކުއާޓަރުގައި ވިއްކި ތެލުގެ މިންވަރު، މިދިޔަ އަހަރުގެ ފަހު ކުއާޓަރާ އަޅާބަލާއިރު 18 މިލިއަން ލީޓަރު އިތުރުވެފައިވާކަން މިނިސްޓަރު ފާހަގަކުރެއްވިއެވެ. މިއީ ރާއްޖޭގެ އިގުތިޞާދު ސިންދަފާތުކުރުމަށް ކުރެވޭ މަސައްކަތުގެ ދަށުން ލިބޭ މުހިންމު ނަތީޖާއެކެވެ.
ރާއްޖޭގެ އިގުތިޞާދު ފުޅާކުރުމަށް 2024 ވަނަ އަހަރުގެ ސެޕްޓެމްބަރު މަހު ފެށި މި ހިދުމަތަކީ ޔޫއޭއީގެ ވިޓޯލް ކުންފުންޏާ ގުޅިގެން އެސްޓީއޯ މެދުވެރިކޮށް ދެމުން އަންނަ ހިދުމަތެކެވެ. މި ހިދުމަތް ދިނުމަށްޓަކައި ބަންކަރިންއަށް ހާއްސަ ބޯޓެއް ބޭނުންކުރަމުންދާއިރު، މިއީ ރާއްޖެއަށް ވަންނަ ބޭރު ފައިސާ އިތުރުކުރުމަށް ސަރުކާރުން އަޅާފައިވާ މުހިންމު ފިޔަވަޅެކެވެ.