މި އަހަރު ރާއްޖެއިން ހައްޖަށްދާ މީހުންގެ އިސްވެރިއެއް ނުވަތަ އަމީރުލްހައްޖުގެ ގޮތުގައި މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ކަނޑައަޅުއްވައިފިއެވެ. އިސްލާމިކް މިނިސްޓްރީން މިކަން ހާމަކޮށްފައިވާއިރު، ހައްޖުގެ މަތިވެރި އަޅުކަމުގައި ބައިވެރިވެވަޑައިގަތުމަށް މިނިސްޓަރު ސައީދު މިއަދު ހެނދުނު ވަނީ ސައުދީ އަރަބިއްޔާއަށް ފުރާވަޑައިގެންފައެވެ.
މިނިސްޓަރު ސައީދު ހައްޖަށް ފުރާވަޑައިގެންނެވީ މިއަދު ހެނދުނު އެމިރޭޓްސްގެ މަތިންދާބޯޓެއްގައެވެ. އާންމު އުސޫލުން ކޮންމެ އަހަރަކު ވެސް ރާއްޖެއިން ހައްޖަށްދާ މީހުންގެ ކަންކަން ބެލެހެއްޓުމަށް ސަރުކާރުގެ އިސް ބޭފުޅަކު އަމީރުލްހައްޖުގެ ގޮތުގައި ރައީސުލްޖުމްހޫރިއްޔާ އައްޔަންކުރައްވައެވެ. އެގޮތުން މިދިޔަ އަހަރު އަމީރުލްހައްޖުގެ ގޮތުގައި ވަޑައިގެންނެވީ އެޑިއުކޭޝަން މިނިސްޓަރު ޑރ. އިސްމާއިލް ޝަފީއުއެވެ.
މި އަހަރުގެ ހައްޖުވެރިންގެ ކަންކަމުގައި އިރުޝާދު ދެއްވާ އިސް ޝެއިޚެއްގެ ގޮތުގައި ހަމަޖައްސަވާފައި ވަނީ އިސްލާމީ ފަތުވާދޭ އެންމެ މަތީ މަޖިލީހުގެ މެމްބަރު ޑރ. އިލްޔާސް ހުސެއިނެވެ. މީގެ އިތުރުން، މި އަހަރު ރާއްޖެއިން ހައްޖަށްދާ މީހުންގެ އެންމެ ފަހު ގްރޫޕް ވެސް މިއަދު ހެނދުނު ވަނީ ސައުދީއަށް ފުރާފައެވެ.
ކުރީ އަހަރުތަކެކޭ އެއްފަދައިން މި އަހަރު ވެސް ރާއްޖެއަށް ލިބުނު 1،000 ހައްޖު ކޯޓާގައި ދިވެހިން ހައްޖުގެ އަޅުކަން އަދާކުރާނެއެވެ. މި ހުރިހާ ހައްޖުވެރިންނަށް ބޭނުންވާ އިންތިޒާމުތައް ސަރުކާރުން ވަނީ ހަމަޖައްސާފައެވެ.