ހުޅުމާލޭގެ ޑިވެލޮޕްމަންޓް ކޮންޓްރޯލްތައް ކަނޑައެޅުމުގެ ގަވާއިދާ އެއްގޮތަށް ކަންކަން އިސްލާހުކޮށްފައިވޭތޯ ބެލުމަށްޓަކައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާއްސަ ސާވޭއެއް ފެށުމަށް ނިންމައިފިއެވެ. މި ސާވޭ ކުރިއަށް ގެންދިއުމަށް ހަމަޖެހިފައިވަނީ ޖުލައި 1، 2026 އިން ފެށިގެންނެވެ.
އެޗްޑީސީން ބުނި ގޮތުގައި، ހުޅުމާލޭގެ ޑިވެލޮޕްމަންޓް ކޮންޓްރޯލްތައް ކަނޑައެޅުމުގެ ގަވާއިދު (ނަންބަރު: 1/2026) އާ އެއްގޮތަށް ކަންކަން އިސްލާހުކުރުމަށް ދީފައިވާ މުއްދަތު ޖޫން 30، 2026 ގެ ނިޔަލަށް ހަމަވާނެއެވެ. އެހެންކަމުން، އަންނަ މަހުގެ ފުރަތަމަ ދުވަހުން ފެށިގެން ކުރިއަށްގެންދާ މި ސާވޭއަކީ އެ ގަވާއިދުގައި ކަނޑައެޅިފައިވާ މިންގަނޑުތަކާ އެއްގޮތަށް ކަންކަން ހުރިތޯ ބެލުމަށް ކުރެވޭ މަސައްކަތެކެވެ.
މި ސާވޭ ކުރިއަށްދާއިރު، ހުޅުމާލޭގައި އިމާރަތްކޮށްފައިވާ ގޯތިތަކާއި އެތަންތަނުގައި ވިޔަފާރީގެ ހަރަކާތްތައް ހިންގާ ފަރާތްތަކުން އެޗްޑީސީގެ ޓީމުތަކަށް ފުރިހަމަ އެއްބާރުލުން ދިނުމަށް އެ ކޯޕަރޭޝަނުން ވަނީ އެދިފައެވެ. މިއީ ހުޅުމާލެ ތަރުތީބުކޮށް، ތަރައްގީކުރުމަށް ކުރެވޭ މުހިންމު މަސައްކަތެއްގެ ގޮތުގައި އެޗްޑީސީން ފާހަގަކުރެއެވެ.
އެޗްޑީސީން އިތުރަށް ބުނެފައިވަނީ، ހުޅުމާލެ ތަރައްގީކުރުމަށް އެ ކޯޕަރޭޝަނުން ކުރަމުންދާ މަސައްކަތްތަކަށް އާންމު ރައްޔިތުންނާއި ވިޔަފާރިތަކުން ދެމުންދާ އެއްބާރުލުމަށް ޝުކުރު އަދާކުރާ ކަމަށެވެ. މި ސާވޭއާ ގުޅޭ އިތުރު މައުލޫމާތު އެ ކޯޕަރޭޝަނުގެ ރަސްމީ އިއުލާންތަކުން ލިބެން ހުންނާނެއެވެ.