އައްޑޫ ސިޓީގެ އިދާރީ ދާއިރާގެ ތެރޭގައި ހިމެނޭ “ސަވާހެލި” އެ ސިޓީގެ އިޚްތިޞާޞުން އުނިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައި، އެކަމާ ގުޅޭ ގަރާރު ނެރުއްވައިފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ނެރުއްވި ނަންބަރު 13/2026 ގަރާރުގައިވާ ގޮތުން، މި ބަދަލު ގެންނެވީ ސިޓީ ކައުންސިލްތަކާއި ރަށު ކައުންސިލްތަކުގެ އިދާރީ ދާއިރާތައް ކަނޑައެޅުމުގެ އިޚްތިޔާރު ރައީސަށް ލިބިދޭ އުޞޫލުގެ ތެރެއިންނެވެ.
ސަރުކާރުން ހާމަކުރައްވާފައިވާ ގޮތުގައި، އައްޑޫ ސިޓީގެ އިޚްތިޞާޞުން ސަވާހެލި އުނިކުރަން ނިންމެވީ އެ ސަރަޙައްދުގައި ފަތުރުވެރިކަން ތަރައްޤީކުރުމަށް މަގުފަހިކުރުމުގެ ބޭނުމުގައެވެ. މިއީ އެ ސަރަޙައްދުގެ އިޤްތިޞާދީ ކުރިއެރުމަށް އެޅުނު މުހިންމު ފިޔަވަޅެއްގެ ގޮތުގައި ސަރުކާރުން ސިފަކުރެއެވެ.
މި ނިންމެވުމާ ގުޅިގެން، އައްޑޫ ސިޓީގެ އިދާރީ ދާއިރާގެ އައު ބޯޑަރުތައް ދައްކުވައިދޭ ޗާޓު މިހާރު ވަނީ ސަރުކާރުގެ ގެޒެޓުގައި ޝާއިޢުކުރައްވާފައެވެ. މި ބަދަލާއެކު އައްޑޫ ސިޓީ ކައުންސިލްގެ ބެލުމުގެ ދަށުން ސަވާހެލި ވަނީ ވަކިކުރެވިފައެވެ.