ޕާކިސްތާނުގެ ޕެޝާވަރުގައި ހުންނަ ސްކޫލެއްގެ ފުރާޅު ވެއްޓި ގިނަ ބަޔަކު މަރުވެ އަދި ޒަޚަމްވި ހިތާމަވެރި ހާދިސާއާ ގުޅިގެން، ދިވެހިރާއްޖޭގެ ޚާރިޖީ ވަޒީރު އިރުތިޝާމް އާދަމް ތައުޒިޔާ ވިދާޅުވެއްޖެއެވެ.
މީސްމީޑިއާ މަންސަ އެކްސްގައި ކުރެއްވި ޕޯސްޓެއްގައި ޚާރިޖީ ވަޒީރު ވަނީ، މި ހާދިސާގައި ފުރާނަ ގެއްލުނު ފަރާތްތަކުގެ އާއިލާތަކަށް އިޚްލާޞްތެރިކަމާއެކު ތައުޒިޔާ ފޮނުއްވައި، އަނިޔާވި މީހުންނަށް އަވަސް ޝިފާއަކަށް އެދިވަޑައިގެންފައެވެ. އަދި މި ހިތާމަވެރި ހާދިސާގެ އަސަރުކުރި އެންމެހައި ފަރާތްތަކާއެކު ހިތާމައިގައި ބައިވެރިވެވަޑައިގަންނަވާ ކަމަށްވެސް އެކަމަނާ ވިދާޅުވިއެވެ.
ބައިނަލްއަޤްވާމީ ޚަބަރު ފަތުރާ ވަސީލަތްތަކުން ރިޕޯޓުކޮށްފައިވާ ގޮތުގައި، ޕެޝާވަރުގެ އަލްޚައިރު އެޑިއުކޭޝަން ސެންޓަރުގެ ފުރާޅު ވެއްޓިފައިވަނީ މިދިޔަ އޮކްޓޫބަރު މަހުގެ 15 ވަނަ ދުވަހު ކިޔަވައިދެމުން ދަނިކޮށެވެ. މި ހާދިސާގައި މަދުވެގެން 34 ކުދިންނާއި ޓީޗަރަކު މަރުވެފައިވާއިރު، އެތައް ބަޔަކު ވަނީ ޒަޚަމްވެފައެވެ.
މި ހާދިސާއާ ގުޅިގެން ސްކޫލް އިމާރާތްތަކުގެ ރައްކާތެރިކަމާމެދު ކަންބޮޑުވުންތައް އުފެދިފައިވާއިރު، ޕާކިސްތާނުގެ ކަމާބެހޭ އިދާރާތަކުން މިހާރު ވަނީ މި މައްސަލަ ތަހުގީގުކުރަން ފަށާފައެވެ.