ފަތުރުވެރިކަމުގެ ސިނާޢަތް ޑައިވަރސިފައިކޮށް، ފަތުރުވެރިކަމުގެ ސިނާޢަތަށް ޒިޔާރަތްކުރާ ފަރާތްތަކަށް މިހާރަށްވުރެ އުފާވެރި ދަތުރުފަތުރުގެ ތަޖުރިބާއަކާއި، ދެމެހެއްޓެނިވި މުސްތަޤްބަލެއް ރަށްރަށަށް ހޯއްދަވައިދެއްވުމަށް ރާއްޖެއިން މަސައްކަތްކުރައްވާނެކަމަށް ޓޫރިޒަމް މިނިސްޓަރ އިބްރާހިމް ފައިސަލް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އައިޓީބީ ބާލިން 2024 ގެ ހަވާސާގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ / ވިޒިޓް މޯލްޑިވްސް) އިން އިންތިޒާމުކޮށްގެން ބޭއްވި މޯލްޑިވްސް މީޑިއާ މީޓް ޕްރެސް ކޮންފަރެންސްގައި ޝަރަފުވެރި މެހެމާނެއްގެ ހައިސިއްޔަތުން ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ޖަރުމަނާއި ބައިނަލްއަޤްވާމީ މީޑިއާގެ މަންދޫބުންނާ ބައްދަލުކުރައްވައި ވާހަކަފުޅު ދައްކަވަމުން މިނިސްޓަރ ފައިސަލް ވަނީ ފަތުރުވެރިކަމުގެ ޒިންމާދާރު އުސޫލުތަކާއި، ޓެކްނޮލޮޖީ އިންޓަރގްރޭޝަނާއި، ކޮމިއުނިޓީ ބޭސްޑް ޓޫރިޒަމާއި، ފަތުރުވެރިކަމުގެ އުފެއްދުންތަކާއި މާކެޓްތައް ފުޅާކޮށް، މުއްސަނދި އަދި ތަފާތު ވިޒިޓަރ އެކްސްޕީރިއަންސެއް ފޯރުކޮށްދިނުމަށް މަސައްކަތްކުރައްވާނެކަމުގެ ޔަޤީންކަން ދެއްވާފައެވެ. އަދި މިދިޔަ މަހުގެ ކުރީކޮޅު ޓޫރިޒަމް މިނިސްޓްރީން އިފްތިތާހުކުރި އިކޯ ޓޫރިޒަމް ފްރޭމްވޯކްގެ މައްޗަށް އަލިއަޅުއްވާލައްވައި، އެކަމަށް ރާއްޖެއިން އަހައްމިއްޔަތުކަން ދޭކަމުގެ ހެއްކެއްގެ ގޮތުގައި އޭނާ ފާހަގަކުރެއްވި އެވެ.
“ޔޫރަޕަކީ ވަރަށް ބޮޑު އެހީތެރިކަމެއް ފޯރުކޮށްދޭ ގައުމެއް ނަމަވެސް، އިރުމަތީ އޭޝިއާ، މެދުއިރުމައްޗާއި އެހެނިހެން ސަރަހައްދުތަކުން ޒިޔާރަތްކުރާ މީހުންގެ އަދަދު އިތުރުވަމުންދާތަން އަޅުގަނޑުމެންނަށް ފެންނަމުން އެބަދޭ،” އާދައިގެ މާކެޓްތަކުގެ ބޭރުން ޑައިވާސިފައި ކުރުމުގެ މުހިންމުކަމުގެ މައްޗަށް އަލިއަޅުއްވާލައްވަމުން މިނިސްޓަރު ވިދާޅުވި އެވެ.
ލަގްޒަރީ ރިސޯޓްތަކުގެ ބޭރުން މިނިސްޓަރު ވަނީ ކޮމިއުނިޓީ ބޭސްޑް ޓުއަރިޒަމް އިނީޝިއޭޓިވްސްއަށް ސަމާލުކަން ދެއްވާފައެވެ. ރާއްޖޭގެ އަތޮޅުތަކުގެ ގެސްޓް ހައުސްތަކުގައި 14،000 އަށް ވުރެ ގިނަ ޓޫރިސްޓް އެނދު ލިބެން ހުރިކަން ފާހަގަކުރައްވަމުން މިނިސްޓަރ ވިދާޅުވީ ރާއްޖެއަކީ އަހަރެމެންގެ ހަރުދަނާ މުޖުތަމައުތަކުގެ ހިތްތަކަށް ވަނުމަށް ވަރަށް ހާއްސަ ފުރުސަތެއް ކަމަށެވެ.
މީގެއިތުރުން މިނިސްޓަރ ވަނީ ފަތުރުވެރިންގެ ސަލާމަތާއި ރައްކާތެރިކަމަކީ ރާއްޖެއިން އެންމެ ބޮޑު އިސްކަމެއްދޭނެކަން ކަމުގައި ވިދާޅުވެފައެވެ.