ބަންގްލަދޭޝްގެ ސަރުކާރާއި ދެކޮޅަށް ކުރަމުންދާ ސިލްސިލާ މުޒާހަރާތަކުގެ ސަބަބުން އެ ޤައުމުގެ ހާލަތު ގޯސްވެ، ރާއްޖޭގެ ޤައުމީ އެއާލައިން ކަމަށްވާ މޯލްޑިވިއަނުން އެ ޤައުމުގެ ޑާކާއަށް މިއަދު ޝެޑިއުލްކޮށްފައި ހުރި ފްލައިޓްތައް ކެންސަލްކޮށްފި އެވެ.
މޯލްޑިވިއަނުން މިއަދު ބުނީ ފްލައިޓްތައް ކެންސަލްކުރަން ޖެހުނީ ބަންގްލަދޭޝްގެ ހާލަތު ގޯސްވުމާ ގުޅިގެން، އެ އެއާލައިނަށް ފްލައިޓް އޮޕަރޭޓް ނުކުރެވިގެން ކަމަށެވެ.
އަދި އެކަން ވަރަށް ގާތުން ބަލަމުން އަންނަ ކަމަށާއި މި ދަނޑިވަޅުގައި ފަސިންޖަރުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުން ދާކަމަށް މޯލްޑިވިއަނުން ވަނީ ބުނެފައެވެ.
މީގެއިތުރުން ފަސިންޖަރުންނާއި ފަޅުވެރިންގެ ސަލާމަތާއި ރައްކާތެރިކަމަކީ މޯލްޑިވިއަނުން އެންމެ ބޮޑު އިސްކަންދޭ ކަންކަމުގައި ބުނެފައިވެއެވެ.
މޯލްޑިވިއަން އިން ވަނީ މިކަމާއި ގުޅޭ މައުލޫމާތު ހޯދުމަށް 1671 އަށް ގުޅުމަށް އެދިފައެވެ. އަދި ޑާކާއިން ދަތުރުކުރާ ފަސިންޖަރުންނަށް +8801621211316 އަށް ގުޅުމަށް އެއާލައިނުން އެދެއެވެ.
މޯލްޑިވިއަނުން ބަންގްލަދޭޝްގެ ވެރިރަށް ޑާކާއަށް ޝެޑިއުލް ދެ ދަތުރުކުރެއެވެ.
ބަންގްލަދޭޝްގައި ފެށި ކޯޓާ މުޒާހަރާ ދިގުދެމިގެން ގޮސް، އިއްޔެ މުޒާހަރާގެ ބައިވެރިން ވަނީ އެ ޤައުމުގެ ބޮޑު ވަޒީރު ޝެއިހު ހަސީނާ ދިރިއުޅުއްވާ ގެކޮޅަށް ވަދެފައެވެ. އަދި ހަސީނާ ވަނީ އިސްތިއުފާ ދެއްވާ އިންޑިޔާއިން ހިމާޔަތް ހޯއްދަވާފައެވެ.