މޯލްޑިވިއަންއަށް އޭޓީއާރު މަރުކާގެ ތިން މަތިންދާބޯޓު ގެނެސްދޭނެ ބަޔަކު ހޯދަން އިއުލާނު ކޮށްފިއެވެ.
މޯލްޑިވިއަން ހިންގާ އައިލެންޑު އޭވިއޭޝަނުން ކުރި އިއުލާނެއްގައި ބުނީ އޭޓީއާރު 42-600 މަރުކައިގެ 3 މަތިންދާ ބޯޓު 15 އަހަރަށް ކުއްޔަށް ހިފަން ބޭނުންވާ ކަމަށެވެ. އަދި މަތިންދާ ބޯޓު ގެނެސްދޭނެ ބަޔަކު ހޯދަނީ ދިގު މުއްދަތުން ފައިސާ ދައްކާ ހަލާސްކުރާ ގޮތަށް ކަމަށް އެ ކުންފުނިން ބުނެއެވެ.
އޭޓީއާރު ބޯޓުތައް ފޯރުކޮށްދޭން ޖެހޭ ތާވަލެއްވަނީ ކަނޑައަޅާފައެވެ. އެގޮތުން މިއަހަރުގެ ޑިސެމްބަރުމަހު އެއް އޭޓީއާރު، އަންނަ އަހަރުގެ އޮގަސްޓުމަހު ދެވަނަ އޭޓީއާރު އަދި 2026ވަނަ އަހަރުގެ އޮކްޓޯބަރުމަހު ތިންވަނަ އޭޓީއާރު މަތިންދާ ބޯޓު ރާއްޖެއަށް ގެންނަން ޖެހޭނެ ކަމަށް ބުނެފައިވެއެވެ.
މި ފުރުސަތު ހުޅުވާލާފައިވަނީ މަތިންދާ ބޯޓު ގެންގުޅޭ ފަރާތްތަކަށާއި ބޯޓު ކުއްޔަށް ދޭ ކުންފުނިތަކާއި ކޮމާޝަލް ބޭންކުތަކަށް އަދި މާލީ ކުންފުނިތަކަށެވެ.
އައިލެންޑު އޭވިއޭޝަނަށް އޭޓީއާރު ބޯޓުތައް ހޯދައިދިނުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ސުންގަޑިއަކީ މިމަހުގެ 29ވަނަ ދުވަހެވެ.